明天就是七月一日，梁振英正式宣誓成為香港特區第三位行政長官，本是佢個人大喜事，點知心思細密，精明過人嘅大人物，竟然百密一疏，私人大宅內有僭建不報，於是未上任已跣低，跣到直晒！話聽日開始有強人強勢領導喎，依家係半跛領導就真。
既然領導人半跛，佢嘅內閣（問責官員）夠強怕得嘞啩，但睇吓星期四宣佈之三司十二局名單，橫睇掂睇都唔似係強人內閣，第一大員政務司司長林鄭月娥叫做打得，過往表現係得過勇字，撞板好易，譬如在新界原居民丁屋及僭建問題上，就顯得進退失據，冇乜謀略。其他各人，要不是係純技術官僚（如張建宗、鄧國威、黎棟國、麥齊光），便是未經考驗新官（如袁國強、張炳良、黃錦星、吳克儉、高永文），或原來不過不失，難以刺激或提升梁先生民望嘅舊人（如曾俊華、陳家強、曾德成、譚志源、蘇錦樑），一言以蔽之，就係成個內閣平平無奇，甚為沉悶，不會為市民帶來興奮與期望，實際啲講，梁先生唔可以靠下屬聲望來抬高佢嘅聲望，一切要靠佢自己。
前幾日碰到一位疑似政府新貴，問佢點睇阿頭嘅僭建問題，佢有啲大惑不解咁講：「梁生同我地講咗不下一次，要注意自己及屋企有無可供報紙捉痛腳嘅問題，例如僭建，有就盡早處理。唉，佢講咗幾次，我真係唔明白偏偏係佢屋企出現僭建問題！點解佢又會唔知嘅？」
此乃懸案，真正答案在梁生心中，其他人好難代佢解釋。挺梁派如鄭耀棠、高永文、張震遠嘅防守線係：無心之失，嚴重疏忽，不涉及個人誠信。偏偏「明報」再搵到空中圖片證明一啲僭建物（白色花棚）係佢入伙後十五個月先至出現嘅，即是在他眼底下建造嘅，與上手業主（發展商劉耀柱）無關，咁點會係無心之失呢？木宰羊！講起劉耀柱，政治版記者唔識佢，馬經版記者就對佢有印象，佢隻舊馬「足球」曾經贏過打吡大賽，馬圈中人好多都識得佢，沙田馬場嘅消息就講到呢位賣豬肉發達，由街市豬肉檔夥計變成地產買賣高手，前統一酒樓老闆嘅劉馬主，對梁特首敢笑不敢言喎。