球隊究竟可以為國家做幾多嘢呢？希臘曾經希望打出好成績來令國民振奮，可惜限米煮限飯，能力有限，希臘還是一隻可憐的歐豬。意大利就唔同，每一次國家球壇有乜依郁醜聞爆出，球隊就爆出更強小宇宙幫你粉飾太平，82如是、06如是，今年未攞冠軍，都已經令大家對意大利刮目相看。
曾經很討厭意大利，一是因為悶蛋，防守第一趕絕「粉絲」；二是因為球星也是悶蛋，馬甸尼係型但一成不變、巴治奧也型但憂鬱得滯，加加埋埋意大利波就係沒趣。今屆一路走來，熱身賽開始有前無後，未見其利先見其弊，睇嚟實死無生；點不知由分組賽第一場對西班牙開始，就令人一見鍾情，進取又好睇。
死守悶波風格送咗畀英格蘭，悶蛋球星形象又畀埋德國，意大利自己就大變身，保方老練得來幽默咗、派路淡定之餘仲有火、卡斯辛奴加巴洛迪利兩儍就為球隊加上現代傳媒最愛嘅娛樂性，令到藍軍得以橫掃社交網站，人氣就係咁火速累積，無論最後意大利攞冠定亞，今屆佢哋嘅洗底工程都相當成功。
今時今日要搞形象，齋用成績真係唔夠，還需要softsell，我諗意大利呢兩日練波都會繼續任君入場，等記者們影多兩張巴神「吞卜」相。
我對巴神的最早印象，來自幾年前佢效力國米時的一場意大利盃，佢好似係後備入替，一入場橫衝亂撞，當隊友斬個傳中波時，佢飛將軍殺入禁區跳頂，結果波頂唔到，但就見到佢跌咗響龍門入面狀甚痛苦！慢鏡睇番原來佢收唔到掣，仲要係雙腳擘大咁撞柱，難怪佢之後手掩要害好幾分鐘！可惜佢當年未夠紅，否則巴神「細佬」受傷一幕，一早已洗facebook版。
文：Keyman
now節目主持