每個成功男人背後，都有一個女人支持；不過一位失敗嘅男人，就好需要一個女人安慰。德國中堅曉姆斯，歐國盃準決賽孭鑊，搞到球隊畀意大利淘汰，好在充滿沮喪嘅佢，比賽完結當晚，就得到女友嘉菲忘情一吻後，心情應該好番好多。
德國對意大利所失第1球，就係曉姆斯守唔住卡斯辛奴，畀卡斯辛奴擺脫後左路傳中，巴神巴洛迪利門前頭槌建功。德國首度喺呢屆賽事落後，踢落更加下風，最終輸1:2出局。德國敗軍上周四晚輸波後返回華沙嘅下榻酒店，眾將都冇咩心機，休息一晚執埋包袱，準備第二朝飛返德國法蘭克福。
停車場溫馨被偷拍
23歲嘅嘉菲就真係絕世跟得女友，自己一個人等到凌晨，終於等到男友落到酒店停車場同佢見面，嘉菲就立即送上香吻，曉姆斯自然開心番晒，不過呢個場面就逃唔過德國狗仔隊嘅鏡頭。嘉菲之前參加過拜仁慕尼黑小姐選舉，家做業餘模特兒，佢冇小豬、馬里奧高美斯等老婆女友咁高調，反而親民形象幾受落。之前德國《圖片報》搞「最佳WAGs」選舉，佢都獲得25%選票，排名僅次於基迪拉裸模女友Gercke。
波歷克插路維亂變一通
曉姆斯有人錫，不過其他罪人就好難搵人安慰；德軍返法蘭克福機場後，雖然仲有球迷接機，不過國內傳媒就繼續插，好似《圖片報》就話，馬里奧高美斯、拿姆、舒韋恩史迪加同普多斯基，係輸波4大罪人。係咁變陣嘅教練路維，就畀前隊長波歷克狂插，波歷克話一屆大賽，用13至15名球員已經好足夠，路維就因為變得太多，搞到球員唔適應。好彩路維合約仲有兩年，德國足總表明撐佢到2014年世界盃。