「兒歌天后」李紫昕（Purple）日前被揭刻薄印傭，疑用分身在網上留言撐自己。雖然證據確鑿，但Purple嬸嬸昨日出席小學生活動時，仍堅稱自己連日來「facebook同微博都冇玩」，當被追問家傭現在睡覺的地方時，Purple嬸嬸沒有回答，只望着公關求救，似乎自知闖禍。
現年40歲的李紫昕、江若琳和馮曦妤昨日在土瓜灣一間小學出席「愛．童孩」巡迴小學探訪活動，一向是小朋友偶像的Purple嬸嬸最近被揭逼印傭瞓廁所，形象直插谷底，現場數百小學生似不知情，沒人柴台，令她暫且鬆一口氣，在台上做司儀時神態自若，展露招牌笑容。
不過，Purple嬸嬸返後台受訪時面有難色，有指她自己開account扮粉絲，又誤用自己facebook留言撐自己，Purple嬸嬸繼續唔認衰，一副無辜樣死撐說：「我唔係好知呢件事，由星期一至今（昨日）都冇上過網，facebook同微博都冇玩，呢件事對我好困擾。坦白講，我嘅私人facebook係唔用中文名，唔知係咪fans開嘅。」問現在家傭瞓邊？她望着身旁公關，不敢再披露家傭睡覺的地方，公關代她回答：「家Purple同屋企人、工人生活得好開心。」
分身繼續開工
記者昨日發現Purple的分身「拜託！你們有點分析力好嗎？」留言已停止運作，換來另一班「紫色昕典－Purple亞太後援網」、「Purple看世界之全球華人後援會」力撐，不斷與其他質疑Purple的網友對罵，其中一段寫着﹕「Purple姐姐這幾天不會上facebook或微博這些是非之地。」留言所講的竟與Purple姐姐出席活動時所講不會上fb和微博如出一轍，未知今次是否又再大話冚大話。另外，江若琳昨日帶病工作，她透露感冒菌入腸，日前要吊鹽水。
採訪、攝影：文國駿
