資訊太多，harddisk太細，3個星期31場波，睇完天未光時記得最多，瞓醒一覺就已經唔見咗一大堆，可能係身體內自己每日清晨自動拋垃圾吧，如果唔係第2日又點可以又重新再download同輸入過呢。
諗番過去咁多屆的歐洲國家盃，剩低的些少回憶都是美妙的，正如阿John每次講起佢以前的女朋友，個個都好sweet，這些就是所謂選擇性記憶吧，醜怪嗰啲相梗delete咗佢啦，剩低自然都係靚嘢。
92年以前自己只係客串球迷，甚麼荷蘭三劍俠同埋丹麥童話都係人講我又講啫，無乜個人感受，96開始就係另一個世界，第一次收費電視播大賽，第一次自己由頭講到尾，原來16年前後都有幾多相似之處，決賽都係同組球隊再碰頭，一隊係大熱一隊係黑馬；都係紅咗黑馬嗰班球員，那些年是尼維特、貝加、普波斯基，今年你可以話意大利班球員都已經好紅，但唔經過呢個月，派路邊有咁神級，巴洛迪利邊有咁入屋呀。
相比之下，當年德國同今年西班牙都已經紅到過咗龍，再下一城人氣都冇乜進展；而96年的賽前，都有一位星級人馬要停完賽先踢得，當年係奇連士文，今年係朗尼，但朗尼製造嘅期望同失望一樣大，奇哥當年一復出就有表現，但始終不及射入史上第一個「黃金入球」嘅比亞荷夫咁巴閉。
入波嘅人會喺成績單上留名，天生就會被注意多啲，好在今屆意大利又唔係畀巴洛迪利威晒，佢入多幾球靚波，威極都已被定位為丑角，主角係3場被選為最佳球員嘅派路，當C朗出局時仍然話：「今年世界足球先生我攞硬」時，更顯出派路的男人味。那一記chip入的12碼，佢話明係為咗打擊對手之後嘅信心而咁做嘅，自己射波，原來唔單止為咗自己威，更係幫隊友一把。至於C朗嘅好隊友拿尼就踢爆C朗講大話，話唔係教練揀C朗射最後，而係佢自己揀嘅，想話威到最後，結果男人最痛無得射喎。
我心目中96年最佳球員係森馬，可惜佢落場搏得滯要提早退休，今屆嘅最佳球員，無論意軍係冠定亞，派路都一定係贏家，因為佢同你當年嘅初戀情人一樣，都係攞個心出嚟嘅一心一意，好純情。
文：keyman