去年寫過蒙古能源（276）員工係戰狼300，事隔快一年，啱啱蒙能出咗業績，股榮仔細睇睇，發現喺蒙能打工，可能係世上最快樂的事。唔使做、人工好、更有彤叔父子撐住，不過買了蒙能賴死唔走的股東，三年又三年等待奇迹降臨，應該覺得自己點解咁「蒙能」呢!
2011年度（3月底結）蒙能全年試產5300噸焦煤，2012年度目標產量為200萬噸，結果全年只向一名客仔付運1.7萬噸咁大把。計吓條數，假設218名全職員工全部做嘢，一年內付運1.7萬噸煤，即每日運送47.5萬噸，平均每人每日做夠0.2噸就可以收工。
貢獻少，待遇卻唔差，去年度員工開支6310萬元，每人每月平均收入2.4萬蚊，算是非常不俗。蒙能過去一年股價勁瀉超過50%，不過員工仍然保持天價，現時公司市值27.7億元，每位人均身價約1271萬元，僅次惠理（806）5369萬元。
雖然人均身價輸了馬鼻，有樣嘢蒙能是第一，就是員工人均蝕錢能力。剛公佈全年業績虧損48.32億元，如單計近年全年財政年度排名第二，僅輸比中國遠洋（1919）去年105億元人民幣虧損。如果除開，平均每名員工攤佔虧損2217萬元，相當於你單獨中三次六合彩金額。對比中遠洋39561位員工，位位蝕錢能力26.54萬元，蒙能絕對超晒班。
員工身價1271萬 年蝕2217萬
蒙能蝕大錢，很大程度是要為礦場減值，不過對於其生意手法，明知蝕錢仍要勉強掘煤，咁蝕底都肯做，股榮認為只是為早前許下的承諾找下台階而已。去年蒙能銷售成本為2050萬元，平均每噸焦煤銷售成本為1182元，不過平均售價卻只有357元，成交較售價貴超過兩倍，即係賣一噸、蝕一噸。
蒙能於07年收購蒙古數萬公頃煤礦，當年聲稱儲量達3億噸，編織出一個美麗的童話、無限的憧憬，殊不知07年至11年度，四年間未曾售出過一塊炭屎，期間卻不斷以不同消息轉移視線，包括彤叔父子入股、高盛入股，煤礦區擴大、簽約大型國企等，股價由2毫子炒到上18蚊，一間沒有產煤的企業，市值竟曾超過1000億元。
核數師已講明，蒙能資不抵債超過5億元，能否再經營下去要睇是否獲得融資。真的要為蒙能估值，股榮認為10億都嫌貴，去年7月股價1蚊樓上，今日唔使5毫子，明年今日應該變仙股。
前輩教落，第一次俾人呃，你可能無知；第二次再俾人呃，你就蠢過天真嬌；再被同一個人呃第三次，你就唔死都冇用。
P.S.大話精CY未上台，政府已經強姦傳媒，拒絕被蒙蔽，今日七一維園見。
股榮