蘋機會：蜘蛛俠變阿伯　原作者驚世現身

蘋機會：蜘蛛俠變阿伯　原作者驚世現身

近年Hit爆嘅英雄片，總有隻Game拍住電影一齊搵銀，呢類Game九成趕鴨上架唔慌好玩。不過今次《TheAmazingSpider-Man》大玩《GTA》式OpenWorld，畀你周圍盪儆惡懲奸外，更有原作者StanLee亂入，扮蜘蛛俠上身喺曼克頓周圍飛，又真係幾過癮喎！

記者：韓繼聰

老版蜘蛛俠救原稿

剛在港上映嘅《蜘蛛俠：驚世現新》，只係將原作故事Reboot一次，唔少人驚訝電影咁快推倒重來，點知隻Game更出位！美國Amazon有款「StanLeeAdventurePack」預約特典，將漫畫原作者StanLee套入《蜘蛛俠》主角彼德柏加身上外，更延伸出一隻老版蜘蛛俠嘅劇情。話說Stan伯啲《蜘蛛俠》原稿，唔小心散落喺曼克頓大小街道，部份更落入惡人手中，阿伯不惜出手搶番。雖然基本玩法一樣，但見StanLee一副89歲老骨頭飛嚟飛去，仲擺埋蜘蛛俠經典Pose，真係一路玩一路笑出嚟。
另外GamesStop亦有款「TheRhinoChallenge」預約特典，無StanLee玩，但就俾你擔演壞蛋「犀牛人」，喺曼克頓四圍搞破壞，繼而挑戰正義英雄蜘蛛俠，生活工作有壓力嘅，應該會幾鍾意。只可惜兩款特典都要喺網站預訂，香港Fans想玩，就要諗計上網搵喇。

■呢位老人家會不時擺出蜘蛛俠經典Pose，堅好笑。

■現實中已年屆89嘅Stan伯，身手拍得住蜘蛛俠。

■StanLee客串過多次Marvel電影，今次終可擔正做主角。

■另一特典就係扮演反派犀牛人，到處破壞，都幾爽㗎。

曼克頓飛盪　撩女升呢

除咗特典過癮，其實遊戲本身做得都算有誠意，特別係佢嘅「FreeRoam」模式，比一般英雄Game跟番劇情爆機有趣得多。玩家可以喺開放式嘅曼克頓地圖中任意闖蕩，打壞人、同路人傾偈，甚至撩吓女仔都仲得。當小地圖顯示某處有罪惡發生，便需第一時間飛去現場，撲滅罪行。無任務時，你甚至可以不顧身份，喺街上大搖大擺周圍Hea，甚至玩吓雜耍，引路人圍觀同影相，滿足一下表演慾。完成唔同任務後，便可Upgrade學新技能，應付更勁敵人，根本係一隻要儲Lv嘅《GTA》。
故事方面，同電影其實無乜關聯，因為除咗蜥蜴人外，蜘蛛俠更要打埋巨型機械怪，一心諗住搶先感受電影劇情嘅Fans，可能會失望喇。

■蜥蜴人造型同電影版有啲唔同，幾乎無人類特徵。

■喺高樓大廈中吊嚟吊去，係蜘蛛俠例牌動作，玩前最好食定暈浪丸。

■FreeRoam模式畀你喺廣大嘅曼哈頓四處縱橫，好Free。

■遊戲後期更要惡戰巨型機械怪。

《TheAmazingSpider-Man》

機種：PS3、Xbox360
類型：動作冒險
售價：約$388