歐國盃決賽戲碼未能如願上演預期中的西班牙大戰德國，一點失望也沒有。事實上，意大利的表現確實更有說服力，更值得殺入決賽，與狂牛一決生死。妙就妙在兩隊波在分組賽已合演了一場讓我回味不已的賽事，當時賽和1:1，既然未分高下，正所謂冇腳影捉，哈，意大利脫唔脫到隻牛角，今晚便有分曉。
講到今晚場波，內心唔係冇掙扎過，我本是西班牙「粉絲」，就係唔信一隊波喺6年內，先贏歐國盃再取世界盃，然後蟬聯歐國盃，歷史上都未出現過。但係我欣賞迪保斯基冇咗韋拿，其他前鋒又冇乜狀態，索性整個賽事中幾乎一直排「無鋒陣」，呢個陣一亮相大家都給嚇倒，但至可以一路殺入決賽，膽色少的，好似荷蘭個尹馬維克又或者德國個路維咪提早畢業，返歸囉！假如狂牛做得到，唔止締造歷史，仲要無鋒登頂，歐洲封王，咁就前無古人，後亦無來者了！
但係意大利係今屆16支隊伍中，3條線都好平均，一個保方，一個派路，一個巴洛迪利，就已經叫人嘆為觀止。單係對英格蘭嗰場，呢個世界最怕貨比貨，同派路同場較技的神奇隊長謝老四，立即變咗隻小學雞，唉，陰功！又睇吓對德國場波，巴洛迪利頭頂腳踢盡現他的天份和質素。而且論進程，論爬升，意大利一場比一場進步，一場較一場精采，極具冠軍本色。
兩隊各有各好，好難揀定捧邊一隊，喺兩隊只能揀一隊，最後惟有揀全心全意支持意大利。這或多或少有點私心，捧意大利是因為巴洛迪利，好簡單，我90%時間睇英超，10%時間睇西甲，完全唔睇意甲。意大利勝出的話，起碼個個禮拜有得睇WHYALWAYSME？嘅巴洛迪利，點都好過睇費托，你話喇，幾何見過又癲又喪又戲劇性嘅前鋒？
文：盧覓雪