卡斯拿斯喺4強就威水嘞，法定時間繼續保持清白之身，連續9場大賽淘汰賽比賽不失球；之後佢喺互射12碼入面救出摩天奴嘅射門，最終幫西班牙贏4:2晉級決賽！不過，佢女友莎拉就擺咗個大烏龍。
訪問恩尼斯達出洋相
做體育女主播嘅莎拉，賽後捉住有份射入12碼嘅恩尼斯達做訪問，佢竟然問小白想唔想射12碼，搞到人哋當堂窒一窒，露出個唔知係苦笑定微笑。一來贏波心情好，二來畀面阿嫂，小白都好客氣：「事實上呢，我有份射12碼嘅，係射第2輪。」其實莎拉之前都犯過唔少低級錯誤，成日俾西班牙球迷鬧，可能今次太過緊張掛住男友救12碼，唔記得咗自己國家隊派咩人負責射啦！