無綫同五大唱片公司因為版稅搞到反目，最終總算搞掂，不過關係不復當年，近日無綫同五大之一嘅環球因簽備忘錄又搞到不歡而散，要歌星唔可以亮相其他同類型節目，同埋歌星嘅表演版權歸無綫，結果先激嬲唱片公司。
藝人不被尊重
環球旗下歌手劉美君噚日到商台宣傳新碟，對於環球同無綫風波不斷，佢力撐公司：「我唔知自己上唔上得無綫，但呢個問題係咪咁重要？我嗰陣做《超級巨聲》又係撞正出唱片，但銷量唔見好好，唔上反而賣多咗。」
劉美君指當日為無綫做主持，想有機會宣傳唱片，但老實不客氣指無綫根本冇幫佢出過力，佢自嘲可能未夠級數。講到支持公司，劉美君解釋：「我哋上去宣傳，錢已經唔多，但係佢哋會將拍咗嘅嘢出DVD賺錢，我哋又冇收錢，我只係對事，呢啲同做翻版有乜嘢分別。」
出言咁大膽直接，唔怕一世被無綫列入黑名單？劉美君話：「有乜所謂，我有城市電訊、now同有線，佢哋啲節目好玩咁多，我不知幾鍾意呢幾個電視台，佢哋當我係人，當你係藝人咁尊重你。」