看見今天電視直播的規模，有點為當年的勁人，如比利和馬勒當拿可惜。今時今日球場上的一舉一動，纖毫畢現；當年呢？唔清唔楚，比利時代甚至係黑白㖭！
講球賽水平，呢廿幾年可能冇乜進步，但電視科技就未曾停過，又高清又3D。屋企睇波嘅清晰度，一早已經過咗現場；好多時現場大電視為免造成起哄，甚至會刻意自我審查，唔播爭議畫面的慢鏡，大家響政府大球場都領教唔少，真無癮。
家立體都有，下一步又點？仲有好多嘢玩嘅，就係再畀你揀唔同視點。英國其實有試過，全場以一支鏡頭，全程影住某一個球員；即是唔係睇波，而係睇人。紐亞你未必想睇，但巴洛迪利就肯定精采，隨時好笑過睇波；唔貴的話，應該有一班癡漢肯「校」多個台。
獨立影球員唔係新嘢，咁若果皮球上的角度又如何呢？嘩！激囉！隨住個波係咁郁，鏡頭拋來拋去，暈浪程度可能勁過坐過山車，屬重口味嘅官能享受，不過可能要準備嘔吐袋。呢個提議成事機會應該細過零，足球領導人個個都有科技恐懼症，實唔制。
波唔得，咁裝響球員身上又得唔得？嗱，遊戲機好早已經有呢個球員主觀功能，每一次睇波都係一次新體驗，咁放個鏡頭響邊呢？梗係個頭度啦，我懷疑捷克門將施治個頭套入面，可能已經擺咗偷拍鏡幾年！
唔爭在整多個台專影球迷嘞，家陣直播唔係冇影女球迷，但係成日一畀球迷發現時，導演就匆匆忙忙take第二個shot；好似裝女仔俾人發現咁心虛。索性整個台啦，可以慢慢睇。
文：Keyman
now節目主持