今屆歐國盃決賽周已到最後階段，球迷廢寢忘餐觀看連場大戰，過足波癮，不少本地兵亦趁唞暑期間，全情投入睇波熱潮。公民老將黃耀富與部份隊友，幾乎每晚也到球會宿舍「密室」睇免費波；至於南華球員則選擇到班主羅傑承旗下卡啦OK，邊嘆美味小食邊看直播，又有另一種味道。記者/攝影：曾雁平、鄧永賢
《公民》
灣仔宿舍成聚腳地
今屆歐國盃只有4場賽事在無綫直播，沒有安裝now的球員又想睇波，便得諗諗方法。本地部份球會如公民及東方等，在球員宿舍都有安裝now；所以部份球員在決賽周期間都相約隊友到宿舍齊齊睇免費波，睇到完場已是清晨，更可以留在宿舍大覺瞓。
早前與公民續新約的守將黃耀富，便是經常約齊隊友返灣仔道公民宿舍睇波的中堅分子；只是公民租給外援居住的球員宿舍原來沒客廳，球員想睇波，便要屈在日本外援中村祐人的房間睇波，因為整個宿舍就只有其房間有裝now解碼器，而中村休季則回日本唞暑。
黃耀富：有伴講波經
富仔表示，由於now有港甲台，球季期間都會不時回宿舍與隊友重溫賽事：「球季結束，家裏冇裝now，又想睇歐國盃，便約守門員謝德謙及中場蘇來強等隊友，齊齊買定零食返來睇直播；睇完可以在宿舍休息，既方便，又唔使好多錢，而且有伴講波經，確是暑期一大樂事。」他透露，他與謝德謙是較狂熱的球迷，其餘隊友只會選擇大戰才看，而今屆看得最多是死亡B組的賽事。
《南華》
book定K房又唱又食
要數歐國盃睇波狂熱分子，南華中場李威廉若要認第二，恐怕也未必有隊友夠膽認第1。採訪當天，雖然兩場準決賽仍未開打，但24場分組賽加上4場8強賽事，威廉坦言僅漏睇過一場，就是戲碼相對較弱的A組分組賽。他說︰「歐國盃4年先得一次，恰好是我們休季期，有時間當然會用盡方法睇晒所有賽事，如分組賽曾試過兩場賽事同時間開賽，我便用埋手機的app睇直播；畢竟歐國盃水準高，睇波都可以偷師，增值自己。」
至於周日的決賽矚目大戰，一直留在家中或赴朋友家中睇波的「威廉王子」表示，有意與隊友到足主羅傑承旗下的RedMrKTV，一邊嘆美食，一邊欣賞好波。
文彼得歐遊嫌氣氛唔夠
威廉身旁的隊友文彼得（Peter）也有同感︰「自球季結束後，確實有好一段時間未見過一眾隊友，決賽大日子，能與隊友一齊在K房睇波聯誼，交流意見，確是賞心樂事。」
剛從歐洲旅遊返港不久的Peter笑言，估唔到歐國盃期間，法國及西班牙市面的歐國盃氣氛未有預期熱烈，甚至比香港更為遜色，「我在凱旋門附近商場的大電視，曾睇過法國對烏克蘭的分組賽，卻出乎意料地少人睇；就算去到西班牙巴塞隆拿，睇波的氣氛也不算濃厚。」難怪Peter聽聞歌星連詩雅，將於決賽當晚到RedMr灣仔分店與球迷玩遊戲後，也直言想參與其中，感受氣氛啦！
港甲兵揀歐盃之最
【最估唔到：俄羅斯】
沈國輝（公民守衞）
俄羅斯分組賽首戰大炒捷克，出線機會形勢大好，第二場賽和主場的波蘭亦是可接受賽果，形勢依然大好；最後一場對實力一般嘅希臘，和波都可出線，點知輸埋，真係估唔到。
【最靚入波：伊巴謙莫域】
陳衍光（公民守衞）
瑞典在分組賽表現不過不失，最終出局確實可惜，但隊長伊巴謙莫域最後一場分組賽對法國那記凌空抽射實在精采。個波斜傳出來比較難射，但佢竟然可以凌空射出個咁靚嘅波，實在嘆為觀止。
【最老而彌堅︰舒夫真高】
李威廉（南華中場）
其實今屆歐國盃有唔少老將都打得唔錯，除咗入咗兩球嘅舒夫真高外，派路、沙維同艾沙維等老將，佢哋搏盡嘅心態都好值得球迷尊敬。踢足球就係要咁，後生有後生好，老嘅都唔代表唔好。
【最意外︰拿姆】
文彼得（南華守衞）
德國喺對希臘8強賽事，好似一直搵唔到入波方法，直至左閘嘅隊長拿姆，後上喺禁區邊射球世界波，成隊德國先至開始上力；而值得一提嘅，係佢近季喺拜仁都踢開右閘，今次喺左邊射入呢球真係有啲意外。
