法國喺8強輸俾西班牙出局兼鬧內訌，喺嗰場波賽後向記者爆粗嘅拿斯尼（圖）受盡抨擊，到禮拜二，佢終於肯公開認死狗道歉。呢位中場透過twitter表示，爆粗行為嚇親唔少球迷同小朋友，對此感到後悔；不過佢好似只係向球迷道歉，依然冇向俾佢鬧嘅記者有表示，仲話有關事件連日嚟有太多不實報道喎。佢話：「我依然熱愛法國隊同足球，亦都非常尊重球迷，至於我同某啲記者嘅問題，會喺適當時候走出嚟講清楚。」講真，道歉係好，不過求其喺自己個網度打幾句，行貨得嚟又冇乜誠意囉。