禮拜三場歐國盃4強，葡萄牙後衞法比奧干查奧無啦啦喺完半場前攞黃牌，相信好多球迷都唔知點解。事關直播影唔到發生乜事。原來干查奧當時同西班牙後備門將連拿嘈交，仲做埋「摸雀」嘅不雅動作，結果搞到攞黃牌。講開連拿，佢絕對係西班牙開心果，龍門唔多使要佢守，專走出嚟助興搞氣氛，今次撩㷫對手，狂牛贏波佢都算有啲功勞㗎。
辣㷫干查奧做不文手勢
呢場雙牙4強戰，皇馬左閘法比奧干查奧都算表現出色，不過唔知點解佢咁睇連拿唔順眼，先向住坐喺後備席嘅連拿唸唸有詞，鬧完後再用右手自摸下體。連拿見到都好嬲，仲起身抗議，向干查奧反擊叫佢收聲。第4裁判喺場邊見到晒事發經過，向主球證報告之後，干查奧就被罰黃牌。由於導致佢領牌嘅動作太不雅（ http://www.youtube.com/watch?feature=player_embedded&v=USMeLQlfFao），所以電視台都冇重播，令到球迷晒頭。
唔講唔覺，原來今屆歐國盃已經係連拿第4次代表西班牙國家隊出戰大賽。不過西班牙有門神卡斯拿斯喺度，第2把交椅亦有巴塞嘅域陀華迪斯；3號門將嘅連拿又點會有機會落場吖，到家都只係喺08歐國盃上陣過1場分組賽嘅大賽咁大把。
西班牙小丑最叻搞氣氛
正如Eason首《浮誇》入面一句：「人潮內越文靜越變得不受理睬，自己要搞出意外」；連拿就算冇份落場，但到西班牙贏到冠軍，凱旋慶祝嘅時候，佢就唔會錯過博上鏡嘅機會。喺08年歐國盃奪標之後，連拿成功搶咪大展歌喉；到兩年前贏埋世界盃，連拿又搞新意思，夾埋佩奧爾一齊將件巴塞隆拿球衣笠落當時仲係阿仙奴一分子嘅法比加斯身上。咁識搞氣氛，難怪國家隊教練屆屆都記得要選佢。西班牙已經殺入今屆歐國盃決賽，連拿可能已經諗定會喺奪標慶功度玩乜嘢。
可能連拿都知自己冇乜機會喺今屆決賽周上陣，最近睇佢身形就好似冇修身咁，相當圓潤；計我求大俠話，以連拿咁識搞氣氛，不如轉做球隊吉祥物或者扮小丑，前途可能仲好啦。