巴洛迪利真係好鬼掂，鍾意做乜就做乜，完全唔理其他人感受。前日，呢位曼城前鋒趁意大利國家隊放假唔使操，就懶理自己係國家隊代表嘅身份，約埋細佬伊諾克喺波蘭克拉科夫幫襯一間水煙酒吧；仲要斷正畀德國小報《圖片報》，圖文並茂咁報出嚟。唔知佢返番去練波嘅時候，會唔會俾意大利教頭柏蘭迪利照肺呢？
意大利喺禮拜日踢走英格蘭入4強後，要等到禮拜四先至同德國爭入決賽，於是教練柏蘭迪利畀班球員喺禮拜二放假，等佢哋鬆一鬆；但腦殘有得玩，真係連老竇姓乜都唔記得。
偕細佬狂歡成粒鐘
其他球員放假多數只係行街食飯，腦殘就零舍唔同；俾準決賽對手德國嘅《圖片報》嘅狗仔隊捉到應，影到佢同細佬伊諾克，坐住架紅色Kia去街街，仲企咗喺間叫SzishaBar嘅酒吧門口。嗰時大約係當地時間晏晝5點半，之後佢哋入咗去，玩成粒鐘先出返嚟，仲表現出一副好滿足嘅樣㖭。本來蒲吧係冇問題，但弊在呢間SzishaBar係專食水煙；門口塊廣告牌仲標榜「包你感受到做埃及人嘅滋味」！
究竟腦殘有冇食到水煙，真係得佢自己先知；但無論如何，佢家陣代表意大利參加歐國盃，就算唔使操，都唔應該亂嚟，做埋啲有損國家隊形象嘅事。睇嚟教練柏蘭迪利真係要搵佢好好傾下先得，再咁落去都唔係辦法，對腦殘自己抑或球隊都好有影響。
寸佢係猩猩意報道歉
雖則腦殘有時真係好過份，但意大利嘅《米蘭體育版》點都唔應該攞佢嘅膚色嚟開玩笑。喺8強贏英格蘭之後嗰日，呢份報章就出咗張卡通，畫腦殘扮KingKong擒上大廈，但就由美國嘅帝國大廈變咗英國嘅大笨鐘；作者ValerioMarini原意係想讚腦殘，點知就有反效果，啲人一睇就以為係寸腦殘係猩猩。事後，《米蘭體育版》雖然即刻道歉，但咁後知後覺，點都係佢哋唔啱啦。
同場加映
早前喺比賽時，坐喺後備席上嘅巴洛迪利（圖），一飲啲運動飲品就噴番晒出嚟，究竟真係咁難飲，定係佢玩嘢呢？互聯網
