基金F請吃早餐，話有事商量。上次研究W話請吃早餐，訂定文華酒店，左丁山話無謂使錢，就近在太平洋咖啡飲杯茶，食件包就算，慳好多嘅啫，研究W話：「又好啫！」於是兩人在太平洋咖啡見面，點知還未食完、傾完偈，已收到熟人WhatsApp：「有人見到你在中環中心飲咖啡！」咁八嘅？唉，邊度仲有私隱呀，好彩唔係同位肉感靚女一齊，否則容乜易連相片都上埋fb？
基金F話去一處地方包保冇人見到，原來就係交易廣場二期48樓美國會西餐廳，呢度食早餐可以食到十一點。大大一間餐廳，連埋我地，只有四個人，各據一方，我地坐在窗前欣賞整個維港景，確係心曠神怡，況且等閒人等唔會走上嚟，私隱程度足夠，係吃飯好地方也。基金F話美國會食物水平一般，勝在時時有位，唔駛預訂都可以上嚟有枱，喺中環邊度搵呀，故此佢每次臨急臨忙去約人，都揀美國會所為見面地點。何況佢一啲內地客戶特別鍾意American呢個名，每次上到48樓，49樓睇維港景色，無不大讚美國人搞會所，話基金F有卡士！
係咁意食三隻煎蛋加腸仔加多士加煎薯餅，九十五元一客，加上咁靚環境，梗係抵啦，不過如果加上入會費，條數當然唔係咁計，基金F在2003年沙士高潮期間入會，當時入會費跌到四十萬元，家梗係不止此數！不過食完就覺得好飽，午餐又約咗基金N到「賀菊」吃午飯，點好呢？記得上次睇醫生，醫生只係俾一個忠告：「唔好食得太多，食少啲有着數！」諗吓都驚驚地，於是自美國會落到嚟，特登搵路行，迂迴曲折咁在中環穿插二十分鐘先至返到公司，秘書即刻話：「基金N又試取消午餐約會嘞，佢話今日要睇住個市，唔得閒喎！」騎騎，正合我意，基金N幾識做吖！不過佢屢次臨時爽約，都係情有可原嘅，對冲基金經理面對股市忽上忽落時刻，又long又short，兼做孖展，你話情緒唔緊張就假嘅，普通人羨慕對冲基金經理搵錢大把，其實佢地蝕本被炒魷之時，鬼可憐咩。基金F管嘅係傳統互惠基金，不借孖展不沽空，賺錢靠眼光去揀股票，並不日日買買賣賣，故此有閒情食早餐食到早上十一點。