無錯，唔係「點蟲蟲」，係「等蟲蟲」，呢架福士Beetle甲蟲仔由舊年四月全球首演亮相、七月國際傳媒試駕發佈會，至一直有傳今年二月到港，等了幾乎年半都未見隻蟲仔影蹤。將金龜仔帶進另一新世紀的第三代TheBeetle，無論性能、外形及內櫳裝潢都全面大革新。甲蟲真的長大了，唔通就係有毛有翼識飛，唔知飛咗去邊？
記者、攝影：許維雅
性能配備集車廠之大成
先同大家溫習吓英文，幾時可以用「The」？在特定名詞的前面，或名詞是同類中的唯一，便會用「The」。從1938年第一代金龜Beetle面世，到1998年第二代NewBeetle將甲蟲蛻變重生，經歷70幾年的洗禮，造型可愛的甲蟲車形象深入民心，全新第三代Beetle命名為「TheBeetle」，實在當之無愧。舊年七月，記者遠赴德國率先試TheBeetle，這架背負着德國汽車歷史重要一頁的甲蟲於柏林試駕，感覺別具意義，報道要等到現在才出街，皆因預計新甲蟲將於下月到港。新一代TheBeetle備有七個版本，包括四個汽油版及三個柴油版，較大機會到港的是1.2L、1.4L及2.0L的TSI引擎版本。以記者試駕的2.0L頂級版而言，換上同廠GTI的Turbo引擎後，令甲蟲性能大躍進，馬力輸出達200匹、扭力有280Nm，極速達223km/h，0-100km/h加速只需7.5秒，配合DSG雙離合器波箱、第六代Golf底盤等車廠招牌作，要達至低油耗高輸出的效果怎會成問題，2.0L頂級版的油耗亦只需7.7L/100km。
內外同步成熟進化
TheBeetle既已變成了一個獨有的Icon，轉款無疑是一大挑戰，要力保甲蟲圓渾可愛的造型又要帶來新鮮感，設計師決定由車頭及尺碼入手。增長152、拉闊84、按扁12mm，令尺碼改為4,278×1,808×1,486mm，配合輕微修改C柱的設計，較以往流線的TheBeetle更有活力。至於新泵把亦是新款最搶眼的地方，線條微微起角，而進氣欄柵中間以一條由左延伸至右的金屬線點綴，整體予人更成熟Trendy的感覺，但又不失甲蟲應有的歡樂，所以即使試駕當日不停落住滂沱大雨，駕着鮮紅甲蟲四處闖蕩依然感覺好玩有趣。至於內櫳裝潢及配備方面，甲蟲仔亦同時升班，不過配備則會因應Beetle、Design及Sport三種版本而有所不同，如亮面中控台飾板，普通版是黑色、Design版則會襯番車身顏色、Sport版就是碳纖面。配合天幕頂、Fender音響系統、新設計多功能軚環及首次於甲蟲出現的免匙系統等配備，都令新一代Beetle進化更趨豪華成熟，絕非只得個殼的玩具車。
TheBeetle
引擎：1,984cc直四TSI
馬力：200ps/5,100rpm
扭力：280Nm/1,700-5,000rpm
傳動：六速DSG自動波連+/-
售價及發售日期：待定
查詢：36989688（VolkswagenHK）