七一臨近，梁特首上任佳期將至，料不到素來以謹慎精明著稱的梁振英先生竟然鬧出僭建風波。別人在山頂大屋僭建不打緊，反正遍街都有，林鄭月娥搵唔到，屋宇署無力追查。但梁振英大屋喎，點可以有僭建呀，特首競選激烈之時，佢嚴厲指責唐英年之九龍塘大屋僭建地庫，毫無誠信，又對記者講佢屋企絕對冇僭建，呢啲說話，有電視台錄音畫面為證，唔呃得人，本港幾間電視台對梁先生已經俾足面，冇播出（至少左丁山冇睇過）佢嘅「之前」、「現在」嘅說話畫面，有自我河蟹之嫌。
前梁營競選辦公室主任張震遠極力護主，聲稱梁大屋僭建不涉及誠信問題，只是以前真的不知道，算是嚴重疏忽。笑話啦，嗰陣時罵唐罵得咁過癮，仲唔事先左查右查自己屋企，查明正身冇僭建？如果冇查到，就係完全不稱職、無能力，梁生做特首咪會好符碌？如果有搵到專家查過仲話冇事，唔該為咗梁生清白，從速公佈嗰啲專家姓名，等市民可以投訴佢地專業失責。
梁先生慣用「白馬非馬論」去詭辯，指自己係產業測量師，唔係建築測量師，故此唔知道屋企有「六處僭建」，又係笑死人冇命賠，佢在香港工專（現理工大學）讀測量，去英國讀測量，唔通完全唔讀香港「建築條例」？好似耳鼻喉醫師唔識分辨腹痛與頭痛、腳痛？
梁振英犯錯，永遠講「無心之失」、「疏忽」，講得多就冇人信，開始俾市民一個印象，若他誠信無問題，他就是講就天下無敵，成日落區都無用，民望只在教育程度較低之基層有支持，以後只能靠派糖捱過任期。梁生未上台，已無堅固議會支持度，建制派對佢係大難臨頭各自飛格，佢想吹雞都吹唔響。梁生上台，無議會建制派擁躉，無過往從政經驗，但有永恒反對派同佢作對，諗落都幾驚，香港市民更傷神，以後五年，不能相信呢個政府可以帶頭搞好香港，反對派以反對他為樂，內耗不斷，市民真係要靠自己，自求多福。