師兄向心悠道歉
另一邊廂的師兄懶理一切，昨日他在馬鞍山出席城市電訊新劇《第二人生》開鏡拜神，師兄大前日為迴避記者，不惜要心悠冒雨在帳篷外訪問，師兄昨日大表歉意說：「嗰日去欣澳有少少誤會，記者朋友俾雨淋，晨早嚟到又做唔到訪問，劉心悠喺雨中出出入入，令到呢個女仔淋到雨，有少少尷尬，我希望同心悠講聲唔好意思，真心地唔好意思。」是否有自我檢討？師兄彎腰鞠躬說：「係我唔啱，對唔住。」他聲稱當時不知道心悠淋雨，保證以後不會發生同類事件。
師兄被嘲扮大哥，他自辯：「吓！睇就知我唔係，點會扮，識我嘅人知我為人係點。」祖兒為戀情親撰自白信，他說：「大家都講咗想講嘅嘢，我未試過拍電視劇，希望大家關注我嘅第一次，男人工作至上。」
「阿詩永遠係好友」
有指師兄撬何韻詩牆腳爆不和，他強調：「何韻詩永遠係好朋友。」阿詩仍當他是好友嗎？師兄口窒窒說：「近期又冇乜點見到佢，我日日要開工。」有指師兄早前在微博向阿詩求婚？師兄說：「小玩意講吓笑啫！」那在微博向祖兒說喜歡她是否認真？他一時語窒，其身旁同事代解圍：「你答多謝各位啦！」師兄即說：「哦！多謝各位啦！畀我專心拍好電視劇先啦！」師兄昨晚6時多拍完戲便坐車返大坑寓所，記者指楊受成不送祝福時，師兄收起黑面，強顏歡笑說：「唔該晒，辛苦晒。」
採訪：魯萍、彭琮然、黃曉程
攝影：陳順禎