孕婦懷胎十月有唔少禁忌要遵守，例如未夠三個月就唔好對外公佈、懷孕時又唔好搬屋免動胎氣，而陀住囡囡六個月、信奉基督教嘅羅敏莊（Mimi），可謂百無禁忌，之前Mimi開騷時只得兩個幾月身孕，就急不及待同大家分享有喜呢件開心事外，前晚佢同老公陳國邦仲拍住拖去九展捧好友黃洋達「棟篤．笑死朕－新九龍皇帝」talkshow場。
搬屋一波三折
Mimi話：「唔擔心個騷聽到粗口影響囡囡，反而同老公好期待黃洋達演出。」滿臉鬚嘅準爸爸陳國邦對囡囡嘅來臨仲未緊張，相反為搬屋嘅事就搞到一波三折，佢話：「原本執好晒啲嘢準備搬，點知遇着打風要取消，到第二日準備再搬，又成日落大雨，希望聽日（今日）能夠順利搬到，安頓好晒啲嘢，我7月要返內地拍劇。」Mimi都話好彩呢段時間老公喺屋企陪住佢兼處理搬屋事宜，如果唔係得佢一個應付就頭痕。