【本報訊】天水圍社區發展陣線昨藉小販羅光清「走鬼」溺斃事件6年，公佈調查結果，指超過八成受訪者支持天光墟合法化。陣線認為主因是天光墟的物價比領匯商戶及大型超市低一至三成。不過小販難做生意，過去一年，被小販管理隊檢控的平均罰款為1,092.5元，相等於大部份小販整月或半個月收入。記者：吳嘉羚
天水圍天恩河畔的天光墟於八年前逐漸成型，約有50多個小販檔，檔主與街坊寒暄不絕於耳。「你飲唔飲凉茶呀？」「超市雞蛋又加價啦！」「今日食環有冇鬼（指小販管理隊）？」但只要在遠處傳來一聲「走鬼」，整個熱鬧的市集瞬即消失。
領匯拒小販租舖位
賣零食及雜貨的小販王太曾申請租領匯舖位，但遭拒絕。「領匯話我唔係公司，又冇試過以公司名義同佢哋合作，所以即時回覆話唔租俾我。」此外，領匯亦以王太售賣的貨品與同場商戶相似為由，拒絕王太。「佢哋話我賣零食會平過大舖頭好多，驚我搶客。」在天光墟當值的食環署職員亦向本報記者表示，天光墟值得支持。「超市賣紙巾40蚊一條，天光墟就25蚊，幫到好多街坊。」有小販指，天光墟的雞蛋售28元30隻，附近超市則賣32元30隻。
40多歲的萍姐在天光墟擺賣5年，堅拒領綜援，靠每天售童裝收入一二百元養活三名子女。「我試過俾食環署捉，充公咗千幾蚊，我心痛咗幾個月，幾晚訓唔着。」萍姐之後轉當清潔工，但很快便離職。「我其中一個仔有過度活躍症，我唔喺屋企看實佢哋就打大交。」現時萍姐每天乘子女上學時間膽戰心驚地開檔。「我每日都好大心理壓力，但我唔想拎綜援，我有手有腳自食其力。」
深水埗北河街亦有午夜墟，主售二手貨。每晚10時至12時有近百小販擺檔，最高人流量可達500人以上。午夜墟將於本周六、日設合法試驗計劃，讓小販在附近球場內擺賣。天水圍社區發展陣線社工黃穎姿表示，天水圍曾有類似試驗計劃，但遭商戶投訴聲浪太大。「小販唔想為社會造成負擔，又搵唔到工，政府何不畀個工作機會佢哋？一定要俾領匯同大商戶趕絕同壟斷？」他說候任特首梁振英也支持設市集，奈何地區組織不支持，難以成事。