【記者倪清江報道】在東區任中學教師的邱Sir自03年起，每年7.1都風雨不改參加遊行。天文台預測7.1當日天氣惡劣，有狂風驟雨，他表明今年「10號風球都出嚟」，要向小圈子、無誠信的特首梁振英說不、向恃勢凌人的羅范椒芬說不、向視李旺陽如草芥的內地當局說不。他說，今年的遊行意欲歷年最強。
「就算冇僭建呢單嘢，都係要反對梁振英。因為我哋冇份選，要抗議小圈子選個咁嘅人。即使唐英年當選都會出嚟反對，不過反對梁振英就更緊要。」邱Sir不認同梁振英的做事方式，「佢嚴重誠信破產，口口聲聲鬧唐英年，話唔係僭建問題，係誠信問題，但佢（梁振英）又做同樣嘅嘢，就更加係誠信問題」。
毋忘羅范惡行
西環中聯辦在背後操控今年特首選舉，路人皆見，邱Sir表示，今年7.1遊行也是為抗議西環亂港，「西環越做越多嘢，（特首）選委話西環畀壓力，貪曾、唐英年被爆黑材料，仲有個別傳媒配合，呢啲非常恐怖，成件事好多黑手、特務政治，我哋睇唔到，但感覺得到」。
比《午夜凶鈴》主角貞子更令教育界心寒的「凶鈴女王」羅范椒芬，完成餘下數日候任特首辦主管工作後，可能躋身行政會議。「好相信佢同梁振英關係，會有主導角色，如果做埋行會召集人，就係影子政務司司長，對教育政策有影響力。」邱Sir指出，教師一定記得羅范說過、做過甚麼，因此必須藉7.1遊行向羅范說不。
不少人都希望7.1上街為「被自殺」的民運人士李旺陽討回公道，邱Sir都有這祈望，只是遊行在下午才舉行，屆時訪港的國席主席胡錦濤料已離開，「雖然已賊過興兵，但有一定影響力」。
邱Sir預期，梁振英不會上任第一日便落台，可能無法阻止羅范加入行會，正正如此，參加遊行才更有逼切性，「如果唔夠人數出嚟反對，佢哋會好開心，所以一定要call（召集）齊人出嚟」。
七一為乜上街？請到蘋果日報facebookfanpage投票吧：
http://www.facebook.com/questions/10151071597587448/