香港人改花名不嬲都有一手，只不過睇呢個巴洛迪利，我們的眼光可能不及國內同胞。我們嘲笑佢神經質，所以叫佢做「腦殘」，彷彿佢係一個自己控制不到自己的人；國內呢？喚他作「巴神」，我哋睇唔通佢，是我們人類的有限，他本來就屬於另一個世界！一個花名，足可見兩地的眼光及視野的高低。
我們也不是沒有代表作的，不知那個本地傳媒是始作俑者，但「裝假九」這個稱呼，實在恰到好處咁幽了西班牙的無鋒陣一默；但你笑我裝腔作勢無前鋒，我的矮仔中場照樣入完一粒又一粒，假戲真做。
多得國內傳媒提醒，原來今屆最強防守球員，又係巴洛迪利。意大利有佢在陣的時間，一球不失，換佢響後備席時卻失了兩球；國內稱他為意國最強避孕套，硬生生咁又奪去了保方的風頭，也遙遙的與我們的杜蕾斯球賽統計相呼應，滴水不漏。
保方在互射12碼前消失了1分鐘，究竟做咗啲乜？若果是小解的話，60秒恐怕唔夠用來除手套，抑或是根本沒有除呢？一連串耐人尋味的舉動，令對手諗極唔明就是高招。
英國首相卡梅倫加把嘴，話唔相信保方賽前的話：「佢唔係睇AV，一定係睇英格蘭射12碼啲片！」人哋肯公開大方認，你又咁小器唔信喎，嗱！我哋睇過周星馳嘅《國產凌凌漆》就明白啦，睇鹹片主要目的，唔係鹹濕咁膚淺，而係減壓，無論係搵子彈殼，定係救12碼，一樣有效，奇妙無窮。
Keyman
now節目主持