我求大俠歐國盃等夜波期間最鍾意煲劇，同樣講歐洲大戰嘅《雷霆傘兵》就係小弟至愛，不過睇番家打完8強，阿仙奴10名參戰歐國盃球員，得番兩位德國兵梅迪薩卡同普多斯基仲生還，情況就好似戲入面班101空降師一樣傷亡慘重。不過對香港球迷嚟講，班廠兵提早放暑假，唞夠後下月喺大球場鬥傑志，對買咗飛睇呢場爆棚波嘅球迷仲唔係個喜訊？
美劇《雷霆傘兵》講一班美軍傘兵由諾曼第開始，打到去希特拉嘅老巢貝希特斯加登，過程當然有死有傷，戰情亦相當慘烈。「廠兵」喺呢屆歐國盃過程都「死得人多」，如果連埋即將加盟嘅普多斯基，阿仙奴有10名球員參戰。一開波，門將施捷斯尼出師不利，領紅牌出場，就算第3場停賽期滿，波蘭都仲用番後備門將泰頓；可憐身為主辦國，波蘭3戰只得2分小組包尾出局，施捷斯尼夾埋踢咗69分鐘。
德國雙兵4強爭正選
同樣分組賽出局就有艾沙維、賓特拿同尹佩斯，俄羅斯出局，之前借番去祖家嘅艾沙維仲俾俄國人民痛罵，搞到要公開道歉。至於丹麥雖然出唔到線，但去季借咗去新特蘭嘅賓特拿入兩球都算搏到盡，但佢老哥露底橫幫賭波公司賣廣告，搞到俾歐洲足協重罰10萬歐元。
「廠兵」打到入8強都唔見得出色，路斯基因傷直頭踢唔到對葡萄牙一役；哥斯尼臨危受命，但法國都頂唔住西班牙。另外，只要通過體測，就會同哥斯尼成為球會隊友嘅法國前鋒基奧特，就講好開心即將加盟阿仙奴同踢英超，因為兵工廠有好多法國兵咁話喎。英格蘭嘅兵工廠雙翼，阿歷士張伯倫8強冇份踢，禾確特60分鐘入替又冇貢獻。德國雖然入4強，但普多斯基8強鬥希臘只能做觀眾，梅迪薩卡俾曉姆斯搶咗個位，1分鐘都冇踢過㖭。
「陣亡兵」唞夠來港鬥傑志
不過站喺香港廠迷嚟講，阿仙奴國腳歐國盃一早「陣亡」，都算係好事，起碼唔使因為歐國盃打到殘，7月29日喺香港大球場同傑志友賽，可以表現出行雲流水嘅進攻，對得住800幾蚊買最貴波飛嘅擁躉。