我求大俠平時都鍾意打番4圈，遇上迷信嘅雀友真係好麻煩，佢哋一輸親就玩「轉凳」、「痾假尿」、「過牌」等等迷信嘢，想邪一邪對手。英格蘭一向互射12碼輸多贏少，周日場歐國盃8強對意大利，法定時間同埋加時雙方都無紀錄，要用12碼分勝負；英軍就有位球迷，諗住邪一邪意軍，直頭除褲出「蕉」，不過家有台灣嬌妻嘅迪亞文迪不為所動，照入可也。
最後一輪12碼中鵠
睇意大利中場迪亞文迪主射最後一輪12碼嘅相，心水清嘅球迷都發現看台第1行出現異樣；有位身穿英格蘭球衣嘅觀眾，打出個大肚腩，嘩！睇真啲，原來連個下體都露晒出嚟。我哋嘅編輯為咗廣大讀者嘅知情權，都照出呢張相，不過當然要打格仔啦；根據個格仔嘅大細，睇得出呢位球迷的確有過人之處。
呢位英軍球迷幾時開始露「蕉」就唔知，但意大利就先有中場蒙杜利禾射失；之前意軍前鋒卡斯辛奴爆隊中有3名同志，盛傳蒙杜利禾就係其中一人，佢係唔係睇到呢位英軍球迷嘅巨「蕉」後，搞到心神恍惚而宴客，就不得而知，不過肯定係「直」嘅迪亞文迪，就冇受影響，照射入網。
台灣親戚：「姊夫太棒了！」
效力博洛尼亞嘅迪亞文迪，講真足球生涯唔算特別出色，香港球迷未必對佢留下深印象，不過佢位台灣人老婆Silvia就好吸引。現年32歲嘅Silvia中文名叫謝佳宜，喺台北出世，兒時舉家移民意大利；佢原本係意國電視台音樂節目主持，透過公開活動結識到迪亞文迪。最終兩人修成正果，4年前結婚之餘，家仲生埋兩個可愛囡囡。
之前林書豪喺NBA紐約人爆紅，佢喺台灣嘅親戚都被傳媒起底同追訪；今次謝佳宜嘅台灣親戚都唔例外，表弟夏經倫到酒吧支持「球星表姊夫」時，就吸引大批傳媒訪問，見到迪亞文迪射入12碼，夏經倫仲高呼「姊夫太棒了！」