喺人生不同的環境裏面，我哋總有幾句廢話傍身，呢種說話雖然冇乜意義，但此時此刻喺指定嘅情況下，唔講好似又唔過癮。
喺各式各樣的比賽後，每當記者訪問得獎者的第一句，總走唔甩會問一聲「開唔開心呀！」，問嘅咁隨口，答嘅又確實唔使點經大腦，「好開心呀……」好來好去的對話係有氣氛，但意義當然欠奉，因為係人都知此等問題只得一個答案，一個答案的問題都要問，作用大概比冇嘢講好少少。
在球場寒暄的環境，另一句意義接近零嘅問題係「今晚邊隊贏呀？」嗱，呢類問題查實真係我哋呢行嘅護身符，即是見到咩人，邊隊贏都可以講餐飽，但查實若果有人咁樣問你的話，你可以估計到，佢由第一刻開始就係旨在搵你吹吓水，冇乜誠意，之不過冇誠意嘅原因，並非呢種問題只得一個答案，而係問嘅人心目中早已有答案，而佢問你其實只係想你講出同佢心目中一樣嘅答案，然後來一下「Bingo」咁啫。
喺街上有人問我「今晚邊隊贏呀？」我試過懶認真分析咁答，點不知路人甲聽完之後，會好醒咁答番我：「唔係喎，我認為係另一隊喎……」佢問我，其實係想話我知佢嘅偉論，只不過扮謙虛問吓你先，鬼叫你咁認真答咩，之後我遇着有路人問功課，我總會反問一句：「你話呢？」咁就相安無事，情形就如我哋體育版每日總有各大小名家畀咗不同嘅意見和推介，波友們好少跟死某大名家，只有當名家嘅睇法同佢一樣，佢就睇囉，旨在搵人支持吓自己嘅睇法啫，真係信你咩！
相比之下，愛人問你「你愛唔愛我呀？」又或保安問你一句「食咗飯未呀？」好似仲易答啲。
Keyman
now節目主持