CY被《日月報（總算在「歸邊」之後，做番啲嘢）》踢爆家有僭建物，而一年前佢向傳媒公開表示，曾諮詢兩名專業人士，「確認其山頂大宅並無僭建物」，之後競選期間，他對唐少的僭建事件大肆抨擊，配合過往佢一直小心翼翼，衣不玷污的作風，倒真是贏得不少市民對他「潔身自愛」的寄望。但今日來看，一切都不過是「五十步笑百步」……最潮講法應該係「二百呎砌二千呎」。
知法犯法 呃晒香港人
候任特首唔單止係香港測量師學會資深會員，並曾任該學會會長，同埋亦係英國皇家測量師學會香港分會前主席，仲未計佢不嬲都係一間國際性測量師行嘅合夥人，咁嘅Quali已經夠殺死人，不過家陣淨係用嚟扮死狗。
佢辯白時聲稱自己只是產業測量師，而非屋宇或建築測量師，所以他並未具備相關嘅專業能力去判斷屋企有冇僭建物喎！一句講晒就係混淆視聽，擘大眼講大話。其實佢喺40年前攞到嗰張測量高級文憑，基本上已證明佢有足夠嘅學術訓練去辨別乜係僭建，乜唔係，所以今日所為完全係「知法犯法」。而以佢嘅專業背景，亦肯定可以勝任一位「認可人士」，即係可以簽圖批則，因此佢嘅過失等同「專業失職」，當該罪加一等。
況且莫講話測量師，就算喺街求其執個有番咁上下年資嘅地產經紀，佢都識得話畀你知乜係僭建，當然若為咗做成單生意而會否刻意隱瞞，就係另外一件事。不過個地產經紀就算係呃，都係呃咗你呢一個買家，所以佢呢世人都冇本事做特首，因為我哋嘅特首係諗住呃晒全港700萬人！
網上已廣傳有心人自費翻查田土廳（即土地註冊處）嘅紀錄，足證CY係直接由發展商買入現址建築，其中未經他手，若然話上手業主僭建在先，除非發展商喺出咗「滿意紙」之後，先至再造手腳，但試問全港有邊個發展商會做埋呢啲戇居嘢？況且交易文件中亦有巨細無遺的平面附圖，之後一磚一瓦的變動，全部有迹可尋，豈會「無中生有」。中間經手嘅專業單位，包括律師同則師都係有頭有面之輩，要個個都咁啱，人人「鬼揞眼」先可以造就到今日集體嘅「無心之失」。
飯焦式邏輯 不知所謂
但不得不佩服嘅就係CY嘅厚黑功力，唐少當日遭圍在「地下行宮」之內，動彈不得，亦招架不住。今CY仍似游刃有餘，未見左支右絀。還能說出，他會一力承擔，自己負責，盡快清拆還原的堂皇之辭。其實全港嘅僭建物一經查證及收到政府通告後，除咗啲新界佬外，一般業主都會知「衰」，然後自行清拆。情況就似啲車俾人影到超速快相，就會扣分同埋要畀罰款，根本說不上甚麼「承擔」，若然又冇人頂包，就梗係要自己「上身」。如果有人話一收到交通告票就即係交罰款，咁樣就係表示自己嘅「誠意」或「歉意」，呢啲咁混賬嘅「飯焦」式「羅」輯，簡直不知所謂。
盧先亞