《Esprit主席回應》
本報直擊思捷（330）德國及上海半百店舖，發現繁忙時段竟然門庭冷落。臨危受命出任主席的柯清輝不諱言，思捷品牌「肯定係有啲攰」，存在少許老化現象，他更坦言「產品有啲問題」，未來思捷確實「有挑戰」。 記者：劉美儀
柯清輝接受本報電話訪問時承認，思捷再投資力度不足及欠缺重新裝修，故「店舖亦有啲攰」，「店舖嘅presentation同competitor（競爭對手）有距離，呢方面管理層從來無否認過……就係因為思捷發展唔與時並進，先至要做改革。」
店舖需要重新裝修
他重申，早前宣佈的改革「一定會繼續」，這是集團大方向，「大改（修訂改革計劃）唔會改，小改（微調）就唔排除，始終整體經濟環境轉差，有調整唔出奇。」
思捷目前情況，柯清輝形容與05年他接任恒生銀行（011）行政總裁時「有啲相似」，「大家都面對品牌有啲老化、店舖要重新裝修嘅問題……我記得當時恒生一年用喺分行裝修嘅預算，便超過1億元。」
向來看淡思捷前景的瑞信零售股分析員陳偉邦，非常認同柯清輝看法。他說：「佢個brand真係舊舊哋，咁無法喎，佢對手一年用營業額4、5%做推廣，思捷只係用1、2%，就算以前係名牌，咁樣搞，咁多年都無晒啦。Theme以前都係名牌，結果咪又係唔得。」
不排除引入策略股東
陳偉邦又批評思捷改革進程慢，「改革咗成年，啲新貨仲要未完全入晒舖，動作有啲慢，啲產品個價仲唔平㖭。」他指出，現時估計思捷何時可「翻身」並無實質意義。
柯清輝任銀行家時，交際手腕高超在行內早已聞名，與「彤叔」等富豪尤為熟稔。對於會否為思捷引入富豪股東，柯清輝說一切言之尚早，現時最重要是為公司找到新行政總裁，「坐定後」再檢視未來發展計劃及如何帶領公司，若屆時認為需要有新資金，考慮引入策略性股東，「到時再睇吓我嘅network（網絡）點樣幫手。」
他曾表示，是因為與思捷前主席邢李㷧份屬老友，再加上對思捷有多年感情，才願意臨危受命。被問及「好朋友」是否仍關心這個一手「湊大」的「baby」，柯清輝笑言不太清楚。他說：「思捷係佢（邢李㷧）以前嘅baby，家仲係唔係就唔知喇。」
對於本報發現思捷科隆及上海分店生意冷清，柯清輝重申，自己乃非執行主席，公司「daytoday」日常業務，記者應向管理團隊查詢，不便評論。