異性雙噏:都係林海峰的錯 - 盧覓雪

異性雙噏:都係林海峰的錯 - 盧覓雪

應該係林海峰嘅錯,因為黃子華係唔講波嘅,而且林海峰呢排真係朝朝孖住鄭兆聰講歐國盃。我身邊亦都多咗一班表演是但噏的人,最弊無一個係林海峰,吹脹!
首先,喺漫長的分組賽過程,有一啲極其唔「好」足球嘅人真係咁樣同我講:「先旨聲明,我唔識波,淨係識得碧咸,佢今屆表現好唔好?」叫我點答呢?此時另一人爭住發表:「我好少少,識埋C朗!講靚仔佢哋都真係叮噹馬頭!」哎!只好苦笑忍住唔搭嘴。
偏偏好多人喺呢個期間爭住投我所好,見面就講波,以下對話全部真人真事,絕對有出處。「吖!睇咗咁耐,點解仲未見到美斯嘅?」大佬,位於南美嘅阿根廷冇資格踢歐洲國家盃啫!地理常識差定係足球常識欠奉?惟有好心解釋,點知佢仲反駁:「咁美斯又可以踢歐聯?」除了笑到流一公升眼淚,還可以氣到嘔十公升血,再唔係一嘢打爆佢個頭,又或者索性絕交!
亦有人知道我捱更抵夜為睇波時,不以為然,竟然話:「係你咁蠢,分組賽使乜睇,等8強緊張啲至睇都未遲。」吓?等8強至睇,咁4強咪仲緊張?既然咁等得,一場過睇決賽咪得咯!諗深一層,呢班分不開國家隊同球會嘅「大賽球迷」,雖然叫人啼笑皆非,但係佢哋一樣被睇波氣氛感染,好似唔講番兩嘴就會俾人話啞嘅咁,即係歐國盃的成功。
事實上像我這樣的標準球迷,好不容易捱完個分組賽,家仲欠一場8強賽事,就入4強,然後就係決賽。換言之,距離今屆歐國盃冠軍產生,只剩下4場比賽(不設季軍戰),真係要好好咁慢慢嗒真啲!畀我設計,4強最好係葡萄牙對西班牙,德國對英格蘭,然後係西班牙撼德國,最後德國勝出。當然更樂意一個唔覺意係英格蘭取代咗德國,我諗我真係會發夢都會笑出聲,相信李克勤都一樣!
文:盧覓雪