球迷與非球迷的其中一個很大的分別，是在表達捱眼瞓的態度，一般來說，每逢周一，又或是大時大節以後，你在早上往公司一看，或facebook一望，都會發現大家講的都是有幾眼瞓，有幾唔喜愛星期一，你本來唔眼瞓，聽得多幾個講自己有幾渴睡時，你可能都忍唔住打個呵欠。
球迷是不同的，在這非人生活的幾個星期裏，我成日在工作圈裏打探各個崗位的朋友，睇睇他們的精神狀況，「點呀，夠唔夠瞓呀？」「唔夠呀！」「咁眼唔眼瞓呀？」「又唔眼瞓喎！」咩道理呀，唔夠瞓但又唔眼瞓，咁同過度活躍嘅小朋友有乜分別呀！或者呢啲就係大賽帶嚟嘅非一般亢奮，會令人上癮、會令人精神，前兩日有一day無比賽，不知幾多「龍友」已經不斷係咁呻無波睇好唔慣，仲瞓唔着㖭，我懷疑睇波已經變種，成為了一種病。
球迷們眼瞓都話唔眼瞓，我相信有一大部份係因為唔想被剝奪咗以後睇波嘅權利。只要你屋企有家人，無論係阿爸阿媽，以至老婆仔女，萬一你響佢哋面前打咗個呵欠，又或唔小心講咗句「有啲眼瞓㖭。」呵，咁就手尾長了嘞，「快啲去瞓啦！」「今晚仲睇？」「聽朝睇重播咪一樣！」「新聞都有播啦……」慘囉，原本的夜闌人靜的自由空間隨時就此被沒收，咁你話男人大丈夫係咪絕對不能隨便響屋企人面前打呵欠呢。除非你屋企係好似《心戰》咁，有個好似陳茵薇咁cute嘅細妹會買定啤酒花生，叫你陪佢睇波又真係唔同。咪就係囉，有個咁嘅細妹，都唔明陳豪點解仲咁得閒去殺人。
仲有一樣心態令到球迷們死都唔話攰，就係成日覺得自己睇咁多波，多少都算係一個運動發燒友，照計身體應該唔會差得去邊；呢個錯誤嘅投射，係電視精嘅共同毛病。正如睇得偵探片多，個個都以為自己曉查案；睇得多愛情片嘅就多少當自己係情聖啦。球迷們的另一半，請你哋多多包涵，唔好篤爆我哋住，求其對我哋體貼啲就得㗎嘞。
至於各位球迷，國內最近有一位年輕球迷不幸陣亡了，大家要引以為鑑，老闆唔響附近時，最好眠一眠！
文：keyman