本港短途馬王「小橋流水」遠征英國，參加皇家雅士葛（RoyalAscot）之國際一級賽，跑直路一千米，順利取勝，為香港爭光，香港馬迷睇電視直播，當然拍爛手掌。在現場嘅馬會總裁應加柏與馬主、練馬師等戴上穿高帽，燕尾大禮服，一齊捧盃，好不高興。應加柏更加對記者講：「派彩窗口唔夠現金俾我！」唔知佢下注「小橋流水」獨贏，贏咗幾多錢呢？
馬主N在家中睇直播，又係贏馬歡呼，唯一遺憾係佢不能提前往英國入馬場觀賽。點解唔去呀？馬主N話：「因本星期事忙有幾個晚宴，最重要係在星期日（六月廿四日），2012倫敦殘疾人奧運會（倫敦殘奧）香港代表團成員名單首度公佈，開記者招待會，我身為義工，要在場參加。」
哦，原來記者會今日下午一時正在荷里活廣場一樓明星廣場舉行，由香港殘疾人奧委會暨傷殘人士體育協會主席馮馬潔嫻女士主持，聯同倫敦殘奧香港代表團團長蔣德祥公佈香港代表團成員名單及各代表備戰情況，各運動員分享備戰訓練過程。
殘疾人士參加殘奧，過程非常艱辛，要在少年時期加入殘體會接受訓練，刻苦練習，備戰經年，加上一路順風，在訓練過程中無傷無損，先至能夠參加遴選。左丁山在西貢訓練場參觀過少年人入營學習及冠軍級運動員練習情況，大為感動，我地四肢健全之人，做一啲擊球動作都不如佢地咁敏捷，而最初四五年學習之時，嗰份堅毅並非常人所能及。
今年倫敦殘奧（八月二十九至九月九日舉行），希望香港代表可以攞到金銀銅獎牌，世界級名將蘇樺偉、余翠怡等甚有希望為港爭光。一位十五歲嘅謝佩婷小姐已擊敗一眾馬術個人賽嘅亞洲區選手，為香港爭取到一個殘奧馬術賽唯一席位，成為香港史上最年輕奧運選手。恒生銀行為獎勵運動員，將頒發獎金，個人項目金牌得主有現金獎30萬元，銀牌，銅牌分別得15萬及7萬5千；隊際項目金牌可獲42萬元，銀牌銅牌得21萬及10萬5千元。恒生銀行行政總裁李慧敏講明，恒生銀行會長遠而持續地支持香港體育發展，希望其他大企業不讓恒生專美，一起支持本港體育！