長實（001）地產投資董事郭子威賣樓手法一向出位，前年賣大圍盛薈時，就因為喺新浪微博上勁放金句，搞到滿城風雨。最近由威哥負責嘅將軍澳峻瀅，官方一早講咗話今日先開價，但華華噚晚收到地產經紀報料，話個盤噚晚已喺微博「開價」，首批有103伙，價錢亦超進取，其中7座15樓G室，即供呎價要7238銀，3座16樓E室即供呎價6207銀，仲即時send咗條link畀華華睇。
但當華華click入條link度，搵勻都唔見張價單，只見到喺17:54留言：「一時手快，搞錯咗，，，請忘記，，，，」，「！！真係打錯呀！！信者自誤呀！幫忙幫忙」，「手快快，，錯呀錯呀！，，，」，最後仲補充：「聽日下午會正式公佈首批價單！」認真離奇，似乎有人知道闖禍，即時攞走張價單毀屍滅迹，留言補鑊。
呢個微博做到勁似「峻瀅」樓盤專頁，除咗有威哥開完記招嘅靚相，仲有唔少金句，包括「香港東峻瀅，歡迎國內客戶，大家都是龍的傳人，有難時人家幫香港，沙士時大家記得嗎……」