有高盧雄雞之稱嘅法國，喺今屆歐國盃半準決賽對住西班牙，輸到飛甩雞毛，最終輸0:2出局。好彩，喺南半球，法國老將前鋒查斯古特就展現咗雄雞風采，同日梅開二度助阿根廷老牌球會河床重返阿甲聯。睇嚟，好似賓施馬呢啲一眾唔識入波嘅法國國腳，真係好應該向大師兄學吓嘢。
喺2000年歐國盃替法國於決賽射入「黃金入球」嘅查斯古特，由於喺08年時與當年嘅法國國家隊教練杜明尼治唔咬弦，因此宣佈於國家隊掛靴。不過，現年34歲嘅佢，其實仲有大把貨；佢喺今年1月由阿聯酋嘅賓尼耶斯加盟阿根廷乙組球隊河床，就繼續有好表現。
阿乙煞科包辦兩球
喺上周六嘅阿乙聯賽煞科戰，查斯古特就梅開二度，協助河床於主場以2:0擊敗艾米蘭特布朗，以38戰得73分成為聯賽冠軍，降班一季後立即回升阿甲；而查斯古特個人則喺阿乙聯取得13球，成為河床嘅次席射手。如果查斯古特喺84分鐘嘅12碼唔係宴客，佢今役仲可以大演帽子戲法㖭！
查斯古特替河床升返上甲組之後，亦都好激動，佢話：「今日我哋完成咗帶領河床重返甲組嘅任務，對於自己能夠貢獻入波，實在好高興。」不過，如果查斯古特知道法國班師弟，喺差唔多開波時間進行嘅歐國盃對西班牙嘅半準決賽，輸波之餘全隊仲踢到死氣沉沉，相信佢一定會由激動變激氣。
下任法國教練諗諗佢
無法啦，查斯古特喺法國國家隊嘅師弟賓施馬，雖然都係光頭仔一名，可惜形似神不似，技術唔夠查斯古特好之餘，把握力亦麻麻；話就話係步大力雄，其實係粗枝大葉，而佢喺大賽隱形嘅死穴，就似足另一名雄雞師兄亨利！計我求大俠話，查斯古特喺10月生日之後都係35歲啫，不如下一任法國國家隊教練考慮吓重召佢，或者叫佢加入教練團，等佢教吓班師弟射波仲好啦！