Cheap曾外訪住超豪酒店全城鬧爆，相信其他高官都上咗一課，好似財政司司長曾俊華咁，上星期去墨西哥嘅洛斯卡沃斯（LosCabos）出席二十國集團（G20）領導人峯會咁，就平實得多喇，有相為證㗎，財爺噚日喺佢網誌放咗一張相，佢喺酒店房門口儍笑，望落去間酒店房唔算大唔算豪，起碼度門冇雕花，加上房門口貼咗寫住曾俊華大名簡體字嘅粉紅色紙，望落去你話係內地地痞酒店都有人信。
過幾日又見胡總
點解要喺房門貼上大名？財爺話，佢今次係以中國代表團成員身份出席G20峯會，所以要同中國代表團入住同一間酒店，喺房門外貼咗成員姓名係方便聯絡啫。胡錦濤係呢次係中國代表團團長，過幾日佢嚟香港出席回歸15周年活動又會見到財爺，真係山水又相逢。