發嬲時會全身着火，還手執鐵鏈，揸住黑色鐵騎瘋狂追殺你，《幽靈車神》畀我嘅感覺，又何止震撼！嚟到續集，殺氣勁過以往，而今日就搵嚟一部52吋電視夾新到嘅3D藍光碟，慢慢欣賞，特別係鐵騎擦身而過一刻，恰如幽靈鬼火撲面而來，仲彷彿Feel到陣風㖭！
記者：陳國輝
攝影:黃子偉
Model：Jamie@GME淘女郎
無敵風火輪震撼
很多人如我般喜歡睇第一集，全因為尊尼（尼古拉斯基治）一身嘅黑色皮褸、黑皮褲Band友造型，加埋死神上身後嗰團怒火，在搖滾樂陪襯之下，到處獵殺罪犯，確實充滿無敵嘅另類正義感！而今集可謂食過番尋味，主角嘅怒火大特寫玩得更盡更激，就連佢駕駛過嘅貨車，甚至重型機器，統統變成一片火海，論熱鬧以及火爆程度，肯定勝過第一集。
當然，3D效果先係今集重頭戲！我哋以Sharp52吋3DTV作測試，佢採用獨家Quattron四色技術，論人像膚色、黑位等，固然要讚，但更值得留意係每逢有火焰鏡頭，3D效果就彷如撲面咁逼真，特別係尊尼駕駛重型機器大戰奸角嗰幕，巨型火球猶如超級風火輪，震撼！
Roller拍攝超驚險
論聲畫，呢一集固然贏晒，但係Bonus部份就跌晒Watt！今次只推出2D+3DBlu-ray，包裝方面算不過不失，可惜並無推出本港碟迷好喜歡收藏嘅鐵盒版；而特別收錄方面，Blu-ray及DVD也只係簡單收錄咗最新預告片、演員專訪以及製作資料三部份，雖然內容唔算得好充實，但我亦要推介大家睇吓幕後拍攝花絮，尤其尼古拉斯基治揸電單車一幕，製作人員竟然一邊踩Roller，一邊為佢進行拍攝，簡直險象環生！
電器查詢：華仁影音（27877992）