李樂詩、石修、江欣慈、寇鴻萍及女兒唐貝詩等前晚出席喺金鐘舉行嘅泓福慈善基金晚宴，有咗七個幾月嘅李樂詩挺住巨肚同老公恩愛出席，見佢步履依然輕盈，佢話：「今次係第二胎，肥咗15磅，照咗係仔，預產期8月，之前仲同老公飛咗去夏威夷，因為6月7日係我哋結婚四周年，我哋喺嗰邊再行婚禮，囝囝就做花仔。」
雖然8月就生得，但李樂詩仲未幫囝囝改名，前晚為慈善，李樂詩仲要挺住巨肚唱歌，佢話：「都有啲怕，從未試過大肚唱歌，個肺好似頂住咁，仲要跳舞。」
江欣慈謀復出
好耐冇見嘅江欣慈就話感情未有進展，所以密謀復出，佢話：「想自薦TVB拍劇，家都有幫屋企搞糖果生意。」而寇鴻萍早前搞咗個網購站，佢話：「大女（唐貝詩）家幫手，都有畀人工個女，但低過市價，因為佢仲食我着我嘅，之前佢遲到四日，我扣咗佢半個月人工，又唔炒得佢，對佢仲嚴過其他員工。」