場景一：星巴克
「唔該，一杯咖啡吖。」
「請問要邊款口味呢？」（指指menu）
（看了一會兒）「Latte吖唔該。」
「凍定熱呢？」
「凍呀唔該。」
「IcedLatte請問要乜嘢size呢？Tall，Grande定Venti呢？」
「吓？乜嘢係……（看了一看櫃面空杯）……哦，呢個吖唔該（指中間size）！」
「請問要正常定skimmedmilk呢？」
「正常得嘞！」
「要唔要加syrup呢，我哋有幾種flavor喎，好似……」
「（打斷）唔使啦唔該。」
「whippedcream呢？」
「好吖唔該。」
「請問有冇興趣試吓我哋嘅三文治或者Muffin呀咁，可以幫你整熱番喎……」
「（再打斷），唔需要啦唔該，我趕時間呀！」（其實開始有點不耐煩，心想：「其實我想飲杯凍咖啡啫，做乜問我咁多嘢喎？如果一早喺街口祥興嗌，一句『凍啡』即刻搞掂唔使煩，杯嘢家都怕已經飲咗一半啦……」）
20年前當我擁有人生中首次所謂的「Starbucks」經驗，便有以上感想。一方面覺得連點一杯小小的日常的咖啡都能「有選擇」真好，都能「個人化」真好；另一方面，性急的我當然也有點不耐煩，算一算剛剛被「盤問」過多少條問題，如果生命中每一個決定都得花時間花精神「詳細推敲」一個簡單的答案……雙腳一伸埋單計數當日一計，我條命將會短了幾多年，只因連去便利店買罐汽水收銀阿嬸都要問我：「要唔要買包香口珠㖭呀，我哋家做緊特價加六蚊有三包三款口味？吓，唔使呀？咁要唔要紙包清涼茶菊花茶呢，三盒都係12蚊啫？」……是，就是這樣我又被「打劫」了10秒鐘的青春，不，連同剛才排隊排我前面的五個人每人10秒，我的陽壽便被剋扣了整整oneminute！！！
當然，人是會學習的，如今遇到這類連環選擇題，大家都懂先發制人：「唔該一杯IcedGrandeLattewithwhippedcream其餘乜都唔使嘞！」
不過，由這杯咖啡引發，我擔心的其實卻是另一些事情，時裝的事情。
場景二：機場移民局
因為不斷警剔自己，所以近年EQ方面好像已有一點點改善，但天生的急性子則仍然按捺不住，每每在某些場合扯火，例如，在機場過移民局。
坐完飛機你已經周身痠痛，拿着手提行李走了一大段路來到移民局時，通常你已經又熱又急尿而且好想快點出閘去玩或歸家，但排隊排在你前面的人不知何故總是甩甩漏漏，吓，拎住張入境表格排了半小時原來冇填過？或者填漏半張，咁就算喺飛機上唔趁得閒一早填好佢，都唔該排隊嗰陣自己check吓啦，仲喺度打牙骹玩手機同發夢，就算未坐過飛機唔知要填，你眼見咁多人俾移民局職員叫佢補填，都會諗吓自己「會唔會寫漏嘢呢，不如自己睇多次或者問吓人囉！」就算知識水平再不高真的不會填，也應知道入境要用passport啩？好心一早摷定拎喺手，唔使輪到你才逐個袋搵番個證件出嚟啦！家幾百人迫晒喺個入境大堂度好舒服咩，你唔心急出去「重獲自由」咩？
我愛惜生命，唔想俾人阻，所以更唔鍾意阻住人，所以在移民局這類處境如果一早沒有把該預備的預備好，令自己暢快順利過關而影響到別人的話，是會責備自己的。
所以我去政府部門申請任何文件前，一定在家裏做好全副旅遊準備兼doublecheck了三次。
所以我在外國旅遊辦退稅前，在往機場的車程上已反覆核對表格的正確無誤。
所以我搭親港鐵，在坐電梯時一定已「淫」定個八通達在手不會在閘前輪到自己才如夢初醒。
所以如果我明知人家7點半關門我7:28就一定不會進店逛阻人收工，寧願明天再來。（除非今天已是減價最後一天或者明天我已離開該城市。）
是，我是一個很討厭「阻住人」的人，為人或者會因此有點壓力甚至給予別人壓力，但我還是認為「不浪費生命」是對的。
雖然我也明白在某些情況下「浪費生命」其實是種「藝術」，「被問好多條選擇題」也能成為「享受」。
例如，我一直夢寐以求的HauteCouture！總不成因為慳時間而給你一張「點心紙」一早剔剔剔剔，五分鐘便玩完，搞掂一件一百萬元的晚裝吧？
場景三：TomFord
所以Relax還是要學的，不是人人天生都會，例如我。
所以今天我在米蘭的TomFord店中和意大利老師傅「hea」了兩三個小時，也算是一種訓練吧，不，應該說是HauteCouture前的一次熱身預習。
Ready-to-wear當然方便，但想更完美地契合自己的身形，擁有更個人化的服裝，也許made-to-measure的bespoketailoring才是答案，而且，如果你真心喜歡「衫」，根本這個度身過程就是你的快速補習班，你知道哪種西裝袖可以只改袖口長短哪些需要全隻袖拆掉在膊頭位動工嗎？你知道waistcoat的長短闊窄要怎樣才算稱身，穿着上扣哪顆鈕不扣哪顆鈕才舒服又不失禮嗎？你知道褲子的「馬蹄腳」是甚麼嗎？你知道為何有些恤衫要特地做到左手袖口比右手寬5mm？
原來去訂做一套衣服不單可以順便上時裝知識課，過程本身還可以是一種可以「慢慢嘆」的節目，最啱我這種性急人「陶冶性情」。
我甚至覺得任何想去訂製HauteCouture的人也應先去度身訂做一套衣服作入門訓練，不一定要TomFord的，其他品牌亦可，不一定要SavilleRow，你阿媽相熟個上海師傅亦OK。
然後，七月頭，我ready去巴黎看高訂秀了，今次就下單？不，我已約定一位常去訂做HauteCouture的香港朋友，先去觀察一下她做衫的過程當學嘢，下一次才到自己吧。
對，當然會把過程記錄下來與大家分享，敬請期待。
是，由在星巴克點一杯「10條選擇題的咖啡」到去找專業人士一同研究出自己的「specialblend」中間還是有很多好玩的。
Textby黃偉文
填詞人，其實最鍾意買嘢，最憎寫字，星期日盡可能唔寫字，去買嘢。
mailto:[email protected]
微博： http://t.sina.com.cn/wymanwong
http://t.qq.com/thewymanwong
