候任特首梁振英心急將新政府架構方案提交立法會審議，點知遇上滑鐵盧，以為可以憑建制派支持，得以在眾多立法會議席中「打尖」，趕快通過。料不到建制派貌合神離，各有主意，詹培忠謝偉俊竟然投反對票，葉劉淑儀棄權，張學明話「心痛」，離開議會不投票。如此這般，想話打尖呀，冇得傾，有記者講俾左丁山知，投票後，民建聯主席譚耀宗面如玄壇，恐怕係唔知點向西環交代啩。
一次投票，露出底牌，好似馬場術語：「走咗光」，哦，候任特首原來冇乜足夠鐵票支持嘅咋，上任後推出新政策，隨時會在立法會跣香蕉皮。咁睇法，九月九日之立法會選舉，西環必然要出盡九牛二虎之力，推自己人入立法會，啲騎牆派冇得留低。
政府新架構走樣不能入焗爐「成形」，組班聽講在司長局長層次，大局已定，但在副局長，政治助理方面，仍然倒瀉籮蟹，上星期四係申請截form嘅日子，但左丁山聽到一啲有心人仍然打鑼搵人，是否真係唔夠人吖，還是要搵人陪跑，好似獵頭族咁，搵起碼幾個候選人俾僱主選擇？左丁山以前有過陪跑經驗，非常無癮，事後同獵頭族鬧到幾乎反面，好彩企業請人，守得秘密，唔會周圍講，但新政府呢次請副局長，幾乎係半公開，記者在門口影相，令到全世界都知，你話一旦落選，幾冇面呢，佢嘅現時老闆心裏又會點諗？奉勸一啲年輕才俊，如曾收到電話，要諗清諗楚先，不可貿然應承去面試。
梁先生希望做大有為特首，以新加坡速度建設香港，點知未入閘先跣腳，佢嘅山頂住宅被發現有僭建，愈揭愈多，有半打之數，雖是無關痛癢，係小事一宗，但素來精明之人，再次發揮三不本色（不清楚、不明白、不知道），講到係無心之失，自己係產業測量師，不是建築測量師，講到似層層，最弊係佢以前斬釘截鐵咁，話自己屋企絕無僭建呢！唐英年第一次講無僭建時講到口窒窒，面紅紅，有心虛感。而梁振英講無僭建則是面不紅耳不熱眼球不動，說話清楚俐落一句到尾。原來講大話都係要專業嘅，唐英年係業餘，輸晒咯。