港人都鍾意北上消費購物，家強國一線城市嘅商場，無論規模同國際品牌都同香港有得揮，但有個問題相信各位經常遇到，就係去洗手間冇紙巾！不過龍湖（960）首席市場官秦力洪同華華保證，去佢哋旗下商場肯定有紙巾用。
因為內地人用紙巾速度仲快過劉翔，好多商場為咗慳錢，都成日唔補充紙巾，但秦力洪就同華華講，佢哋個女老闆吳亞軍成日微服出巡視察，有次發現洗手間冇紙用，即刻打畀商場經理投訴。個經理解釋話，以前一個鐘補一次紙巾，但好快就用完，跟住變成兩個鐘，甚至四個鐘換，啲紙巾好似燒銀紙咁快，但吳總就話要辦國際一流嘅商場，「這些錢絕對不能省！」自此龍湖嘅商場幾時都有紙巾用嘞。
除咗保證有紙用，秦力洪又話，集團同阿里巴巴傾緊，考慮將旗下物業管理平台放上淘寶商城，要搞一站式嘅購物同管理服務，認真多花款！