我求大俠真係估唔到，F1車手咸姆頓竟然咁唔嗅米氣；身為英國人，竟然唔識足球，亦唔知英格蘭家喺波蘭同埋烏克蘭參加緊歐國盃決賽周。真係抵佢俾英國傳媒用「ShameonLew！」嚟鬧佢。
正喺西班牙華倫西亞準備下周日場F1歐洲站嘅咸姆頓，成日俾人話似英格蘭國腳翼鋒禾確特，亦同另一國腳艾舒利楊格係同學，但估唔到原來佢係足球白癡。
唔知英意戰幾點開波
日前當有記者問佢點睇英格蘭對意大利場歐國盃8強戰，呢個27歲嘅麥拿侖車手居然咁答：「其實我唔知場波幾時打。」可能黑帝知道講錯嘢，之後立即幫自己兜番：「希望我睇到呢場波啦。佢哋（英格蘭）近排真係打得唔錯。」黑帝你放心，你場F1開香港時間下周日夜晚8點，英格蘭場波就開深夜2點9，瞓飽覺再起身睇波仲得。
咸姆頓之後開始吹水，講番啲大路嘢就扮識波。佢咁話：「我希望我哋喺今年嘅表現，會比之前好啦；但係，個賽事仲有好多支出色嘅球隊，其中西班牙就係其中一支勁旅嘞。」至於同場接受記者訪問嘅西班牙車手艾朗素就對答如流；梗係啦，呢位法拉利車手真係識波㗎嘛，平時仲成日同超鍾意足球嘅德國車神舒密加一齊踢波㖭。
身為英國人要惡補
足球係英國國技，英超更加係全球最受歡迎嘅聯賽，而英國亦有唔少名人都超鍾意呢項運動，就好似係RobbieWilliams、GordonRamsay同埋兩位王子威廉同哈里等；如果咸姆頓唔識籃球，真係冇人會怪佢，但係唔識足球就一定唔得。咪話我求大俠唔教精佢，有時間就惡補吓啲足球知識，咪淨係掛住同歌星女友妮歌周圍玩；若然喺奧運期間俾人問關於英國足球隊啲嘢，又再口啞啞，你話幾樣衰呢！