黃百鳴自言編導演的電影不少，不過最難的一部要數97年替太太「執導」的那一場。太太忽然驗出患上末期卵巢癌，一邊要控制家人的情緒，另一面要四出訪尋名醫，他形容當時去到亂石投林的地步，不過這套戲不能輸，因為賭的是命，故事最後像他編劇的電影一樣喜劇收場。15年後他講到當日的心路歷程，分享的是那碗可能比偏方或氣功更有效，是一碗給病人的心靈雞湯。 撰文：何永寧
電影公司老闆黃百鳴今年暑假在書展中跟一班模爭飯食，不過賣點既無事業線、又不會滴雪糕，書名更是毫不起眼的《生存．奮鬥》，講的是15年前他跟太太一起經歷的一場抗癌戰。黃百鳴太太當年在毫無先兆下得了卵巢癌，由於癌細胞擴散開刀亦無補於事，黃百鳴日前接受訪問時回想當日經過說：「太太安排咗做手術，我好記得嗰日係6月13日黑色星期五，醫生一打開個肚就話已經成肚都係癌腫瘤，最大嗰粒有成7、8厘米大冇得切，最後係openandclose乜嘢都冇做過。」
親友探病講笑話
當時黃百鳴第一件做的事就是要仍在加拿大讀書的兒子立刻回香港，集合一家人去打這場仗，他說：「當時見到老婆插到成身都係喉，好似個扯線公仔咁，不過我同對仔女講『見到媽咪唔准喊，要笑，等佢知道仲有希望』。」就連來探病的親友都要這樣，他說：「我同啲探佢嘅朋友講，同佢講笑話佢開心，如果你入去喊嘅就唔該你唔好入去。」平生編寫過無數喜劇，到這個關頭依然要寫下去，他說：「當時我好冷靜，覺得只要你積極已經贏咗一半。我哋集合一家人力量去打呢場仗，同我太太一齊練氣功嘅病友家屬都咁講，叫佢哋對住病人要笑唔好喊，你越喊個病人越冇信心，咁就一定輸。」
另一方面黃百鳴又四圍打聽民間偏方，每有合適的還親身試藥：「聽到有味藥醫好個血癌病人，我咪執劑返嚟自己食咗先，冇事至畀老婆食。」太太接受醫院化療療程時，他更老遠走到廣東一處偏遠地方打齋，祈求太太平安過渡，黃百鳴說：「前一個月至喺西安拍咗套講火箭嘅電影，估唔到一個月後要喺間破廟度又跪又拜咗一個通宵。」他自言不是導人迷信，但只要幫到太太的事他都會做。
度假六日現奇蹟
在醫治了一個月後黃百鳴還跟太太說，會一家大細到馬六甲剛買的大屋度假，對當時仍滿肚腹水的太太來說，自然覺得有點奇怪，他說：「佢事後話唔明我點解咁有信心，事實真係成行。度假嘅時候太太依然好有恆心每日練佢嘅動氣功。」經過六日馬來西亞之旅後回到香港，故事發展就如黃百鳴預先編好的劇本，太太入院檢查發現腫瘤已縮至只有一厘米，最後更消失得無影無蹤。
黃百鳴事後表示不知是氣功有效，還是藥物起了作用，不過他堅信對病者的心靈雞湯保持開朗絕對有助改善病情。他笑言太太亦由以往一般行街、打牌說長道短的家庭主婦，變成對人生更積極，他笑着說：「佢家忙過我，成日教人練氣功，去醫院做義工，以前一星期打七日牌到家一日，叫佢睇首映要預約。」經歷病變，夫婦間感情亦由猜疑變成信任，黃百鳴說：「嗰時晚晚開通宵度橋，佢又聽埋啲三姑六婆講埋啲是非，心諗你仲唔係去滾，邊有咁多會開。到佢病發我掉低晒啲工作同佢去抗癌，咁都仲唔信我咩。」
