可能因為趙海珠開咗先例，今時今日再有姐仔由公仔箱跳入金魚缸，大家第一個反應隨時係：「乜唔係要做咗電視先可以入呢行嘅咩？」
07年參選港姐、曾經喺TVB主持《創富坊》嘅王卉霖（Anita）亦揀咗同一條路，轉行做耀才證券（1428）網台主播。Anita選港姐之前，做過金屬期貨交易員，究竟係轉咗行定係撈番本業？已經分唔得咁清。
日日對住咁多股上上落落，特別喺電視台接觸好多輪證，Anita都忍唔住落場玩，結果幾萬蚊去，返嚟少咗個零，冇咗八、九成。Anita接受《爽報》專訪時都話：「自己唔太適合玩呢種高風險產品，玩Warrant要好貼市，反應好快。」所以佢家嘅組合，長揸建行（939）、工行（1398）；亦會買二三線股，「自己仲後生，可承受較高風險」。但唔會長揸，「買賣股票一定要嚴守紀律」，要識止賺。
最佳投資：打扮同進修
不過，Anita經過兩年磨練，最重要係投資喺自己身上，例如打扮同進修：選港姐，學識對鏡頭chok樣；做財經主播，就加深財經知識，有助社交，「如果冇話題，無論工作朋友定投資，都會喪失好多表現自己嘅機會」。聽完好想同咁多位剩女或盛女講句：與其花錢學45度，不如多啲留意時事啦！
李華華
mailto:[email protected]
