歐洲足協認真唔掂，旗下嘅球證喺烏克蘭對英格蘭場波搞咗單世紀錯判出嚟；而佢哋亦立即做嘢，將個匈牙利底線球證華特逐出賽事；而華特仲累街坊，連累主球證卡沙爾同旁證等共5人，都冇得留低。歐洲足協自己做錯就低調處理，但其他國家有乜問題就重罰，一唔跟規矩就係咁罰錢；由開賽至今，佢哋收到球隊或球員嘅罰款，已經近38萬歐元（約374萬港元）；家陣個賽事仲有成個幾禮拜玩，睇怕啲罰款隨時突破50萬歐元。另外，已掛雞嘅意大利名牌球證哥連拿（右），話今屆啲球證表現得唔錯，但功不抵過，如果再犯幾次大錯，就算做得幾好都冇人會記得囉。