認識一個3歲小朋友，擁有一項特異功能，就是每逢見到任何一個大人時，總會講出這位大人的另一半的名字，即是當佢見到姨丈時就會話：「姨丈，姨媽喺邊呀？」然後見到姑姐又會問：「姑姐，姑丈喺邊呀？」很有趣是他總會認得你身邊的另一個人，記得你們是一對的，但不有趣的是，他總是對不在場的那個很好奇，對在場的那位卻不聞不問。
我諗呢位小朋友，未來大個了應該很適合做講波佬，因為我們評述途中，最常講的其中一款說話，就係好可惜邊個冇落場，好可惜邊個冇上陣，若果阿邊個邊個有落場，或者後備上陣呢，咁情況就有甚麼甚麼的分別了。
所以呢，有兩類球員就算無上陣，佢嘅名字都經常被提到，曝光率很高，第一類呢，係大名但又年紀唔細或者係成日受傷嘅，由於係人都知佢曾經有幾掂，所以當佢隊波有咩唔掂，咁就自然會聯想起呢類球星。昔日代表係奧雲，早熟早殘又多傷嘅佢，唔落場時比真係落場時，仲多人提，諗落都有啲黯然。今屆EURO被人提得最多嘅，先有軍刀後有朗尼，尤幸兩位落場期間都交足貨，無辜負大家期望。
不過另一類常被提到的名字，就係一班後備，佢哋名堂唔響，但都擁有殺着，悶局就係掛住佢哋嘅時候，古有曼聯的蘇斯克查、今屆就有葡萄牙嘅施維斯達華利拿，甚或至意大利嘅基奧雲高，佢哋打正選可能未夠班，但打後備就隨時殺出血路。
講到咁勁，但其實你問100個球員，都唔會有一個想做後備。
Keyman
now節目主持