日前44歲嘅林憶蓮喺台灣話唔抗拒姊弟戀，正享受曖昧嘅甜蜜生活，似乎半公開佢同33歲恭碩良（Jun）嘅關係，感情有着落嘅憶蓮，佢同前夫李宗盛所生嘅女李喜兒嘅問題似乎令佢好頭痛。
家喺香港讀緊國際學校Grade8嘅喜兒正處於反叛嘅年齡，佢喺facebook貼咗好多佢同外籍小朋友玩得好癲嘅相，其中有張意識都好大膽，有個鬼妹仔作勢錫喜兒嘅胸部。
其實之前都有話憶蓮個女作為明星二代，加上佢個樣早熟，喺學校一直係風頭躉，仲聯羣結隊杯葛一啲同學仔，搞到雙方嘅朋友喺facebook爆發罵戰。
母女關係疏離
其實憶蓮同囡囡嘅關係仲值得關心，因為喺喜兒嘅facebook裏面，淨係見到貼咗李宗盛嘅相，仲用嚟砌咗個心形，反而同佢一齊生活嘅憶蓮，就唔多覺有佢嘅相喺度。之前憶蓮喺香港開演唱會，喜兒冇去捧場，寧願同朋友仔行街，似乎兩女母關係好疏離。