【本報訊】發展局長林鄭月娥上星期宣佈，以「建造、營運、轉移」（BuildOperateTransfer，簡稱BOT）形式重建舊政總西座，用途繼續是「政府、機構及社區」。不過公共專業聯盟指此安排違反政府多個部門內部指引，旨在逃避立法會及巿民監察。
退休建築師李鉞昨指，以BOT模式去重建規模不大的西座，很可能是全球首次。「BOT係用喺一啲好複雜而回報又唔明朗嘅項目，或者政府無錢，只有係啲情況，政府先引入私人機構。重建西座有幾複雜？回報又可以幾唔明朗？我哋個政府又係唔係好窮呢？」
「小題大做」利官商勾結
公共專業聯盟成員黎廣德則指，用BOT把西座重建，不但令巿民損失了一幢歷史建築，破壞了政府山完整性，亦損害庫房收入，甚至更易官商勾結。他指政府以雙信封制去挑選中標者，「賣地，大家都睇得清清楚楚係價高者得，但雙信封，一個係技術，一個係錢；技術呢樣嘢，你同政府關係好啲，清楚政府嘅諗法，又或者係附近有地，可以同政府講利用附近嘅地做到多啲嘢，結果係庫房收少咗錢，塊地可能畀咗同政府關係好嘅發展商」。
他們亦質疑，政府為何不理城巿規劃委員會的指引，堅持重建後的西座繼續是「政府、機構及社區」用地。根據資料，重建後的大廈約七成作商業用途，但城規會的指引則列明假如「政府、機構及社區」用地上有逾一半是非公眾用途，政府要改變地皮的用途。
根據城規條例，以BOT重建西座，巿民只有三星期時間發表意見，城規會亦不用開聽證會，整個過程在兩個月內完成，不用刊憲及上行會；若當局跟隨指引，巿民最少有近三個月時間發表意見，城規會亦要按法例舉行聽證會。
公共專業聯盟質疑現在的安排是讓政府逃過立法會及巿民的監察，要求政府擱置拆卸西座。