人力資源經理C睇本欄講及美國電腦人才搵工易，打電話嚟訴苦：「我地公司要招IT人，搵到索氣，試過有兩三位已經簽咗employmentletter，但上工前一個星期就通知我佢地唔會嚟，好嘅電腦軟件人員真係好難搵到㗎！」中小企老闆K亦打電話嚟講：「點止電腦人難搵呀，我地間工程公司想聘請年青工程師，亦係好難，而家人人都話讀商科，對工程睇唔上眼，遲啲我地工程界會接班無人！」
冇人呀，唔夠工程師呀，咪去印度搵囉，一套印度電影就點出，印度家長最希望兒女讀工程，逼兒女讀工程，以至成為家庭磨擦根源，印度有咁多人口，工程師應該過剩，電腦人亦過剩，如果合用嘅，不妨去印度招聘。
講到呢樣，老闆K就立即叫住左丁山：「輸入外勞係非常敏感嘅政治問題，唔可以公開講，特別係九月九日之前，最近我有出席一個論壇，講及工人短缺，無論老闆級及工會代表都承認勞工不足，特別係現時好興旺嘅建造業，工會代表提到建造業工人日薪郁吓就過千，連負責pack嘢嘅搬運工人都起碼八百五十銀一日，因人手不足，工資還是看漲。老闆級代表乘機話輸入外勞，工會代表立即反口，話要求老闆加薪，希望吸引二十幾歲年青人入行，才是治本之計等等，於是變咗雞同鴨講，毫無結論。」年青人有幾多個肯做三行學徒呀，攞嚟講，表面上話唔畀輸入勞工，但左丁山在中環街上碰口碰面都見到南亞裔掘路工人，真不知從何而來。
輸入外勞，又係新加坡做得到，香港做不到，CY又要嘆息為何香港效率、速度落後於新加坡。香港各行各業都有人手不足現象，尤其是建造業與醫療業，你試吓講輸入醫生吖嗱，完全係對住圍牆講嘢，毫無回應。林奮強「黃金五十」寫咗個報告，建議香港大量輸入外國醫生，仿效新加坡做法，現任特區政府唔出聲都算嘞，未來政府肯有正面回應先至係新聞。如此情況，通脹不高企（供應短缺兼利率太低），吾不信也，CY常言解決民生問題，我地要大力發言：勞工供應短缺呀！