八十年代尾，香港娛樂圈吹正日本風，造就了擁日本妹式爆牙的87年香港小姐季軍林穎嫺（Wing）走紅；廿多年後，昔日的可愛小花旦已變身三孩之母。當年Wing事業如日方中，毅然放棄事業到美國讀書，最終選擇家庭退出娛樂圈，是對？是錯？當她見到三個孩子健康快樂地成長，認定自己抉擇正確，無怨無悔，更將出版書籍，分享育兒心得。 撰文：羅美倫
眼前已43歲的林穎嫺，退出娛樂圈後移居美國生活廿多年，昔日的日本妹容貌已褪色，換來一臉美國人氣息，也成了電腦軟件顧問TomDupont的太太，育有8歲的兒子Teddy、6歲女兒Michelle及3歲囡囡Julie，在洛衫磯落地生根。Wing今次回港，宣傳她將出版的育兒心得書籍，聽着阿Wing不老的聲音說回前塵往事，像坐上時光機返到上個世紀。
當選港姐季軍，Wing即被捧做小花旦，但密密拍了兩年劇集，90年毅然決定去美國讀書，她說：「就係因為港姐多活動，見好多政界人、商人，我只係中學畢業，同人對答、溝通唔到，覺得自己有好多不足先決定要讀書。」
當紅毅然引退
人家選港姐就是為入娛樂圈拍戲做女主角，Wing偏偏在事業發展得最好時去讀書，她坦言：「拍戲好玩又拍得好好，但如果唔趁後生讀書，老咗未必應付得嚟，拍戲更多，就更難抽身離開。」Wing在美國南加州大學讀會計課程時，每年暑假都返港為無綫拍劇，依然得寵，繼續做女主角，直至94年畢業，無綫要求她返來履行未完的合約，Wing當時考慮幾個月，決定放棄事業。
Wing說：「嗰時未結婚未有細路，但我諗如果留港拍劇唔走，我將來嘅小朋友要喺香港讀書咪好辛苦？所以就選擇返美國做嘢，之後識咗老公，美國嘅教學方法真係唔同，係值得留低，值得為佢哋放棄事業。」肯定自己沒揀錯？Wing笑言：「唔知留喺度會點㗎，留喺度可能再紅，可能唔紅呢？我好滿意家，見到佢哋三個好開心就覺值得！」
親力親為湊仔
Wing的決絕全因她以家庭為重，她不想混亂的拍戲時間影響照顧孩子：「我唔捨得少咗時間見家人，唔想老公、仔女唔識我。」退出娛樂圈，Wing在美國從事會計工作，結識了老公Tom後，99年結成夫婦，03年生下大仔Teddy後便全職做家庭主婦，相夫教子。問她還記不記得自己做女主角的風光日子，Wing說：「記得，嗰啲係美好回憶，好好玩，我都有同囡囡講，以前媽咪係拍戲㗎，佢問我好唔好玩，我話值得，因為有青春，老咗想拍都難，而且可以識好多朋友，練到膽，係好好嘅經驗。」
一下子由多姿多采的女主角變成生活公式化的家庭主婦，Wing說：「係性格問題，我鍾意戶外活動，美國仲多嘢適合我玩，後尾生咗小朋友，根本冇時間悶。」現在仔女都長大了，Wing開始多了自己時間，就將湊仔心得寫成書與人分享，她說：「心得係要親力親為，不能假手於人，我生完Julie都想做番嘢保持同社會接觸，但老公話點解你要去請人做你細路嘅媽咪？最緊要擺多啲時間，工作已唔係第一位。」
可有興趣再回來拍劇？近年也有看部份熱門劇集的Wing說：「唔知呀，拍劇要咁多時間，拍嘢係好玩，一班人好開心，但家庭都好緊要，如果配合到家庭都OK，例如暑假，到時可以諗下。」
