陳小春同應采兒結婚以嚟，都係鬼咁恩愛，雖然之前一度懷疑有內地女星想做小三，介入佢哋嘅婚姻，但應采兒立即出招阻止索女埋老公身。嚟緊下月8號度過45歲生日嘅小春，同應采兒婚後一直都恨做老竇媽咪，只可惜未有好消息，但啱啱前日過咗29歲生日嘅應采兒，噚日突然喺微博留言話：「我唯一的生日願望成真了。」即時惹人揣測，唔知係咪佢同小春造人成功？就呢件事向小春同應采兒嘅公司求證，經理人公司李小姐冇即時否認話：「應采兒就話多謝各位關心，咁急做乜啫，有好消息會同大家講。」
放假閉關造人
其實近日小春同應采兒都同公司請咗一個長假期，講到明呢個假期嘅目的就係要造人，唔怪得好兄弟鄭伊健喺8月演唱會都要同小春度定期，費事阻住佢嘅生育大計。
其實小春同應采兒恨生BB真係恨到出面，好似之前父親節，佢哋抱住個BB話希望下年有機會過父親節，一度惹嚟造人成功嘅疑雲。