尚在測試嘅《3D古龍群俠傳Online》，未推出已勁有Noise，最爆就係搵嚟唔知真癲定假儍嘅龍心，擔演十大惡人兼做埋代言人，記者親訪拍攝造型現場，膽粗粗要佢即場試玩。大題及內文那個「X」字有無限含意，可以係笑喊坐踎，以及一堆助語詞。
記者：韓繼聰
攝影：黃子偉
維園霆鋒癲喪實錄
MK挑釁蠱惑仔
在人多擠逼嘅西洋菜街，大大聲話自己係揸Fit人，叫各字頭速速彈開！引嚟過百途人圍觀。
扮步驚雲周街劈
拎住步驚雲把絕世好劍，當街當巷「演武」，YouTube片有埋伊健歌聲襯底，睇落似模似樣喎。
癲喪惡人 打機有紋路
其實早已在網上睇過唔少龍心的「事迹」，今次親身同佢見面做訪問，自然免不了戰戰兢兢，估唔到真係未見其真身已被嚇一嚇。一出電梯門突如其來一聲大喝，再伴隨一大堆問候人爸爸媽媽的凌厲粗口，以為有人鬧大交，一開門先知原來係龍心喺度投入緊惡人角色。今次《3D古龍群俠傳Online》搵龍心做十大惡人，實在入型入格，演歐陽丁當兄弟嘅佢，着起戲服拿住碌棍，Chok起上嚟真係有七分似霆鋒，對攝影師各樣要求亦交足貨。難怪佢可以豪言：「我一出嚟，班明星就大鑊，死X梗！」其後龍心更換上超Sexy透視裝，扮演陰九幽，面對咁難Carry嘅戲服，一樣從容不迫，毫不尷尬兼自信，絕對有明星風範！
自吹勁過《Diablo》
雖然龍心不時粗口問候在場生人死物，但打機時則相當有紋有路。傳說讀電腦出身嘅龍心，一坐低就問隻Game要求硬件規格有幾高，同工作人員吹水吹得頭頭是道，正常到你驚。玩起嚟極快上手，更邊玩邊讚：「妖！啲3D好X正！仲勁過《Diablo》！加埋我做代言，隻Game真係可以推向全世界，呢鋪大鑊喇，發梗！」咁識擦老細鞋，你話佢堅儍？我話佢假癲就真！
打中罩門即KO
講番吓隻Game，上集的刀、槍、拳、劍、棍和暗器係遊戲的精髓，今集就融合轉化成全新嘅六大武學。玩家更可向不同勢力的小說人物借用稀世神兵，擔演古龍世界的英雄。另外新加嘅五行相剋罩門戰鬥系統，及QTE（QuickTimeEvents）玩法，可透過掌握敵人弱點，突襲施展一擊必殺，令PK戰更具緊張快感。難怪得到唔少有份測試嘅網友激讚刺激好玩，加上人物夠熟夠親切，玩厭《Diablo》，係時候轉吓Game喇！
《3D古龍群俠傳Online》重定兵器譜新手版
機種：PC
類型：MMORPG
開發：智樂堂
代理：Gameone
售價：$10
